एनसेलका डेटा प्याक प्रयोगकर्तालाई मेटलाइफको बीमा सुरक्षा योजना

काठमाडौं । एनसेल र मेटलाइफ मिलेर ‘डाटासँगै जीवन बीमा’ नामक एक योजना ल्याएका छन्। यो सेवा लिने ग्राहकले मोबाइल डेटाका साथै जीवन बीमा तथा घातक रोगको बीमा एकैसाथ पाउने कम्पनीले बताएको छ। यो सेवा अन्तर्गत एनसेलका ग्राहकहरूले दुई विशेष प्याकेजहरूमध्ये कुनै एक रोजेर बीमाको फाइदा लिन सक्छन् जसमा डेटा प्रयोगसँगै बीमा सुविधा पनि प्राप्त हुन्छ।

यी दुई प्याकेजमध्ये पहिलोमा कर सहित ९९ रुपैयाँको प्याक रहेको छ। ३ दिन समयसीमा रहेको यो प्याकमा १०० एमबी डेटा, २ लाख रुपैयाँ बराबरको म्यादी जीवन बीमा र त्यतिनै रुपैयाँ बराबरको घातक रोग बीमा पाइन्छ।

दोस्रोमा ३९ रुपैयाँको प्याक रहेको छ। यो प्याकमा ग्राहकले ३ दिनका लागि १०० एमबी डेटा, ५० हजार रुपैयाँ बराबरको म्यादी जीवन बीमा र त्यतिनै रुपैयाँ बराबरको घातक रोग बीमा पाउँछन्। यी दुवै बीमा सुविधा प्याक खरीद गरिएको मितिबाट ३० दिनसम्म मान्य रहने कम्पनीले जनाएको छ।

कम्पनीका अनुसार ग्राहकहरूले एनसेल एपमार्फत आफूलाई मनपर्ने प्याक छानी बीमाका लागि एउटा फाराम भरेर सजिलै यी दुई मध्ये एक प्याक लिन सक्छन्। प्याक लिएका ग्राहकहरूको टर्म लाइफ इन्स्योरेन्स फारम बुझाउने बित्तिकै तुरुन्तै शुरु हुन्छ भने क्रिटिकल इलनेस (गम्भीर रोग) कभरेज ३० दिनको प्रतीक्षा अवधिपछि सक्रिय हुन्छ।

यसले एनसेल प्रयोगकर्ताका लागि बीमा पहुँच सहज बनाउने लक्ष्य राखेको छ। विशेषतः लामो समयदेखि यस्तो सेवाबाट वञ्चित विकट दूरदराजका समुदायहरूलाई यसले ठूलो महत्व राख्छ। सुलभ शुल्क, पूर्ण डिजिटल प्रक्रिया र प्रभावकारी बीमा सुविधासहितको ‘डाटासँगै जीवन बीमा’ योजनाले नेपालको वित्तीय समावेशिता र सामाजिक सुरक्षातर्फको यात्रामा महत्वपूर्ण यात्रा शुरु गरेको कम्पनीले उल्लेख गरेको छ ।

‘मेटलाइफ नेपालसँग साझेदारी गर्दै देशभरका ग्राहकहरूका लागि बीमा सुरक्षा सहितको सेवा दिन पाउँदा हामी अत्यन्तै खुशी छौं। यो सहकार्यले नेपाली समुदायको तल्लो स्तरसम्म पुगेर ठूलो समूहलाई बीमा पहुँच विस्तार गर्ने सामाजिक प्रतिबद्धता पनि बोकेको छ। आफ्ना ग्राहकहरूका लागि भ्यालु सिर्जना गर्नु हाम्रो कार्यको केन्द्रबिन्दु हो जसले उनीहरूको जीवनमा मुस्कान र सकारात्मकता ल्याउँछ।” एनसेलका चीफ कन्जुमर बिजनेश अफिसर उपङ्ग दत्तले भने।

मेटलाइफ नेपालका प्रमुख वितरण अधिकृत अरुण बहादुर बस्नेतले भने, ‘मेटलाइफ नेपालमा हामी सुरक्षा सबैको अधिकार हो सुविधा होइन भन्ने विश्वास गर्छौं। यो साझेदारीको उद्देश्य पहिलोपटक सानो र छोटो अवधिको डेटा खरीदबाट तपाईं र तपाईंको परिवारलाई दीर्घकालीन मानसिक शान्ति प्राप्त गराई सुरक्षित राख्नु हो।’