नेसन्स लिग : चेकविरुद्ध इङ्ल्यान्डको जित
काठमाडौं। इङ्ल्यान्डले नेसन्स लिगमा चेक गणतन्त्रलाई २–० ले पराजित गरेको छ। प्रागमा भएको खेलमा घरेलु टोली २३औं मिनेटमै पाभेल शुल्च रातो कार्ड पाएपछि १० खेलाडीमा सीमित भएको थियो।
तर‚ पहिलो हाफमा इङ्ल्यान्डले संख्यात्मक फाइदाको पर्याप्त सदुपयोग गर्न सकेन। दोस्रो हाफ सुरु भएको दुई मिनेटमै भने एन्थोनी गोर्डनले गोल गर्दै इङ्ल्यान्डलाई अग्रता दिलाए।
ट्रेन्ट एलेक्जान्डर–आर्नोल्डले पेनाल्टी क्षेत्रभित्र उत्कृष्ट बल पठाउँदा गोर्डनले हेडरमार्फत बललाई गोलको तल्लो कुनामा पुर्याए।
त्यसपछि इङ्ल्यान्डले थप अवसर सिर्जना गरे पनि दोस्रो गोलका लागि ६९औं मिनेटसम्म कुर्नुपर्यो। चेक डिफेन्सको गल्तीबाट आएको बलमा कप्तान ह्यारी केनले सही समयमा पुगेर उत्कृष्ट फिनिस गर्दै टोलीको अग्रता २–० बनाए।
