सरकारको विरोध गर्दा गोली हान्ने धम्की आयो – ऐन महर
प्रतिपक्षी दल नेकपा एमालेका प्रमुख सचेतक ऐन महरले गुण र दोषका आधारमा सरकारको समर्थन वा विरोध गर्दा आफूलाई ज्यान मार्ने धम्की आउने गरेको गुनासो गरेका छन्। मंगलबारको प्रतिनिधिसभा बैठकमा सभामुख डीपी अर्यालले दिएको समयमा बोल्दै उनले यस्तो गुनासो गरेका हुन् ।
आफूहरू संसद्मा जनताका आवाज उठाउनका लागि जनताकै मत पाएर आएको उल्लेख गर्दै सांसद महरले आफूहरूले सरकारको विरोध मात्र नगरेको स्पष्ट पारे।
उनले भने,‘सरकारको हामी गुण र दोषको आधारमा समर्थन र विरोध गर्छौं । सरकारलाई हामी सही बाटो देखाउन चाहन्छौं। बिडम्बना, सदनमा बोलिरहँदा सरकारको कहिलेकाँही विरोध गरेको केही मान्छेहरूलाई आभाष हुँदो रहेछ । मलाई निरन्तर धम्की आइराखेको छ । फेसबुकमा, फोनमा गोली हानिदिन्छु, मारिदिन्छु भनेको छ ।’
