मध्यपूर्वमा अमेरिकी विशेष फौजका सैयौँ सैनिक तैनाथ
काठमाडौं । बीबीसीको अमेरिकी साझेदार सञ्चारमाध्यम सीबीएस न्युजका अनुसार अमेरिकी विशेष फौजका सैयौँ सैनिक मध्यपूर्व क्षेत्रमा पुगेका छन् । रिपोर्टअनुसार अमेरिकी नेभी सिल्स, अमेरिकी आर्मी रेन्जर्स र प्याराट्रुपर्स (हवाईमार्गबाट झर्ने सैनिक) त्यहाँ तैनाथ भइसकेका छन् । साथै अमेरिकी मरीन फौज पनि यो क्षेत्रमा उपस्थित रहेको जनाइएको छ ।
स्रोतहरूलाई उदृत गर्दै सीबीएसले जनाएअनुसार यी सैनिकहरूको तैनाथीको उद्देश्य अमेरिकी राष्ट्रपति डोनाल्ड ट्रम्पलाई इरानसँग सम्बन्धित सम्भावित कारबाहीका विकल्पहरू उपलब्ध गराउनु हो ।
सम्भावित विकल्पहरूमा होर्मुज जलघाँटी खोल्ने, खार्ग टापुबाट तेल नियन्त्रण गर्ने वा इरानको समृद्ध युरेनियम भण्डारमाथि नियन्त्रण गर्ने अभियानसमेत पर्न सक्छन् । अमेरिकी केन्द्रीय कमानले यस विषयमा टिप्पणी गर्न अस्वीकार गरेको छ । यसअघि शनिबार सेन्टकमले ३ हजार ५ सय नौसैनिक र मरीन यूएसएस ट्रिपोलीमा सवार भएर मध्यपूर्व पुगेको जानकारी दिएको थियो ।
