टी-२० विश्वकप : आज दक्षिण अफ्रिका र न्युजिल्याण्ड सेमिफाइनलमा भिड्दै
काठमाडौं । आईसीसी टी–२० विश्वकपअन्तर्गत पहिलो सेमिफाइनल खेल आज हुँदैछ। उपाधि यात्रालाई निरन्तरता दिने लक्ष्यसहित दक्षिण अफ्रिका राष्ट्रिय क्रिकेट टोली र न्युजिल्याण्ड राष्ट्रिय क्रिकेट टोली आमनेसामने हुन लागेका हुन्।
खेल भारतको कोलकातास्थित इडेन गार्डेन मा नेपाली समयअनुसार साँझ ७:१५ बजे सुरु हुनेछ। सुपर-८ अन्तर्गत समूह ‘ए’ को विजेताका रूपमा दक्षिण अफ्रिका सेमिफाइनलमा प्रवेश गरेको हो। उसले सुपर-८ चरणमा जिम्बाब्वेलाई ५ विकेट, वेस्ट इन्डिजलाई ९ विकेट तथा भारतलाई ७६ रनले पराजित गर्दै प्रभावशाली प्रदर्शन गरेको थियो।
यता, न्युजिल्याण्ड पनि सन्तुलित प्रदर्शनका आधारमा अन्तिम चारमा पुगेको हो। जारी विश्वकपमा यी दुई टोलीबीच दोस्रो पटक प्रतिस्पर्धा हुन लागेको हो। दुवै टोली दोस्रोपटक टी-२० विश्वकपको फाइनल पुग्ने लक्ष्यमा छन्। दोस्रो सेमिफाइनल खेल भोलि हुनेछ, जहाँ साविक विजेता भारत र इङ्ल्याण्ड आमनेसामने हुनेछन्। फाइनल खेल आगामी आइतबार तय गरिएको छ।
