नेप्से परिसूचमा ४३ अंकको पहिरो, कारोबार साढे ३ अर्ब माथि
काठमाडौं । साताको सेयर कारोबार हुने पहिलो दिन नेप्से परिसूचक उच्च अंकले घटेर बन्द भएको छ । गत साता करिब साढे २ प्रतिशतले घटेको बजार आज झण्डै २ प्रतिशतले घटेको हो ।
आजको कारोबार बन्द हुँदा नेप्से परिसूचक ४३.८९ अंकले घटेर २५१३.४२ विन्दुमा पुगेको छ । जुन अघिल्लो कारोबार भन्दा १.७१ प्रतिशतले कम हो । आज सेयर बजारमा २५३ कम्पनीको मूल्य घटेको छ भने २१ कम्पनीको मात्रै बढेको छ । आज ४ कम्पनीको सेयर मूल्य स्थिर रहेको छ ।
त्यस्तै आज सेन्सेटिभ इन्डेक्स पनि ६.६८ अंकले घटेर ४४४.२४ विन्दुमा पुगेको छ । आज सेयर बजारका १३ उपसूचकमध्ये १२ वटाको सेयर मूल्य घटेको छ भने एउटाको मात्रै बढेको छ ।परिसूचक उच्च अंकले घटेको दिन सेयर बजारमा साढे ३ अर्ब माथिको कारोबार भएको छ । आज ३४७ कम्पनीका ९३ लाख ८ हजार २२५ कित्ता सेयर ६८ हजार १५ पटक खरिद बिक्री हुँदा ३ अर्ब ६४ करोड ११ लाख ७ हजार ४३८ रुपैयाँको कारोबार भएको छ । आज एउटा कम्पनीको सेयर मूल्यमा नकारात्मक सर्किट लागेर कारोबार भएको छ ।
