अपदस्थ बाङ्गलादेशी पूर्वप्रधानमन्त्री शेख हसिनाद्वारा ज्यानको जोखिम भए पनि डिसेम्बरभित्रै स्वदेश फर्कने घोषणा
काठमाडौं । बाङ्गलादेशकी अपदस्थ पूर्वप्रधानमन्त्री शेख हसिनाले पक्राउ, जेल वा मृत्युदण्डको जोखिम सामना गर्नुपरे तापनि आउँदो डिसेम्बरभित्रै स्वदेश फर्कन दृढ रहेको बताएकी छन्।
सन् २०२४ को अगस्टमा देश छाडेर नयाँ दिल्लीमा रहँदै आएकी ७८ वर्षीया पूर्वनेता हसिनाले समाचार एजेन्सी एएफपीलाई इमेलमार्फत दिएको उत्तरमा स्वदेश फर्कँदा आइपर्ने परिणाम सामना गर्न आफू तयार रहेको उल्लेख गरेकी हुन्।
“म मारिन सक्छु, पक्राउ पर्न सक्छु वा जेल पठाउन सकिन्छ,” हसिनाले भनेकी छन्, “म मेरो भाग्यप्रति पूर्ण रूपमा सचेत छु। तैपनि म फर्कन चाहन्छु किनभने मेरा जनताले मलाई बोलाइरहेका छन्।” यसअघि हसिनाले रोयटर्ससँग कुरा गर्दै आफू र आफ्ना राजनीतिक सहयोगीहरू निर्वासनबाट फर्केर बाङ्गलादेशका अदालतहरूको सामना गर्ने बताएकी थिइन्।
सन् २०२४ मा विद्यार्थी नेतृत्वमा भएको आन्दोलन दबाउने क्रममा भएको दमनलाई लिएर बाङ्गलादेशको अन्तर्राष्ट्रिय अपराध ट्रिब्युनलले हसिनालाई उनको अनुपस्थितिमै मृत्युदण्डको सजाय सुनाएको छ। १५ वर्ष लामो शासन अन्त्य भएपछि उहाँका विरुद्ध मानवअधिकार उल्लङ्घनका धेरै मुद्दाहरू दर्ता गरिएका छन् भने उहाँको पार्टी अवामी लिगलाई राजनीतिक गतिविधिमा प्रतिबन्ध लगाइएको छ।
