दशैंको मौकामा जुम्लाबाट बिके १० करोडका खसीहरु
जुम्ला । यस वर्षको दसैँको अवधिमा करिब १० करोड रुपैयाँ बराबरको कारोबार भएको छ । सदरमुकाम खलङ्गा बजारलगायत यहाँका स्थानीय तहमा भएको खसी र भेडा खरिद बिक्रीबाट उक्त परिमाणमा कारोकार भएको हो ।
चन्दननाथ नगरपालिका पशुपन्छी विकास शाखाका प्रमुख वीरबहादुर रावतले भन्नुभयो, “तीमध्ये स्थानीय भेडा ९ करोड ३४ लाख ८८ हजार रुपैयाँ, खसी ३७ लाख ४० हजार खरिद बिक्री भएको हो । जिल्लाभर करिब २ करोड अन्य भेडा बिक्री भएको अनुमान गरिएको छ । यस्तै, नगरपालिका क्षेत्रबाट रु २६ लाख ७७ हजारको राँगो, भैँसी खरिद बिक्री भएको छ ।’
यस वर्ष दसैँका लागि मात्र पाँच हजार ८४३ भेडा, २५६ खसी र ६३ राँगो खरिद बिक्री भएको बिक्री भएको तथ्याङ्क छ । दसैँमा स्थानीय भेडाको अधिकतम मूल्य २३ हजार, न्यूनतम मूल्य ९ हजार र औसत मूल्य १६ हजार रुपैयाँ तोकिएको पशुपन्छी विकास शाखा प्रमुख रावतले बताए ।
खसीको अधिकतम मूल्य २२ हजार, न्यूनतम मूल्य रु आठ हजार, औसत मूल्य १५ हजार रहेको छ । यस्तै, राँगोभैँसीको अधिकतम मूल्य ६१ हजार, न्यूनतम मूल्य २४ हजार र औसत मूल्य ४२ हजार ५०० रुपैयाँ रहेको छ ।
यहाँ मुगु, कालीकोट, दैलेख, बाजुरालगायत जिल्लाबाट खसी, भेडा र राँगोभैँसी ल्याइएको थियो । गत वर्षको दसैँमा १६ करोड ३२ लाख ३१ हजार रुपैयाँ मूल्य बराबरका नगरपालिकाले जनाएको छ । गत वर्षभन्दा यो वर्ष भेडा र खसीको मूल्य औषत रूपमा ३० प्रतिशतले घटेको यहाँका स्थानीय व्यापारीले बताएका छन् ।
