बैंकले कर्मचारीलाई बोनस दिन छुट्याए १० अर्ब ६१ करोड

काठमाडौं । सञ्चालनमा रहेका २० वाणिज्य बैंकले आफ्ना कर्मचारीका लागि बोनस दिन गत आर्थिक वर्षमा १० अर्ब ६१ करोड १३ लाख रुपैयाँ रकम छुट्याएका छन् ।

वाणिज्य बैंकले कर्मचारीको बोनसका लागि छुट्याएको उक्त रकम अघिल्लो आवको असार मसान्तको तुलनामा ९.७२ प्रतिशतले धेरै हो । अघिल्लो आवको सोही अवधिमा बैंकहरुले कर्मचारीको बोसनका लागि ९ अर्ब ६७ करोड १२ लाख रुपैयाँ छुट्याएका थिए । उक्त रकम बैंकले कर्मचारीलाई बोनस दिएका थिए ।

बोनस ऐनमा कर्मचारी बोनसका लागि नाफाको १० प्रतिशत छुट्याउनुपर्ने व्यवस्था छ । उक्त व्यवस्था अनुसार २० बैंकले कर्मचारीका लागि १० अर्ब ६१ करोड १३ लाख रुपैयाँ छुट्याएका हुन् । गत आवमा बैंकको नाफा अघिल्लो आवको तुलनामा ४३.३९ प्रतिशतले बढेर ७१ अर्ब ५१ करोड ८ लाख १८ हजार रुपैयाँ पुगेको छ । बैंकहरुको नाफा ४३.३९ प्रतिशतले बढ्दा कर्मचारीलाई दिने बोनस भने ९.७२ प्रतिशतले बढेको छ ।

२० वटा वाणिज्य बैंकमध्ये ६ वटा बैंकले कर्मचारीलाई दिने बोनसको रकम घटेको छ भने बाँकी १४ वटा बैंकको यस्तो रकम बढेको छ । कर्मचारीको बोनसका लागि धेरै रकम नबिल बैंकले छुट्याएको छ भने सबैभन्दा कम एनआईसी एसिया बैंकको रहेको छ ।
नबिल बैंकले कर्मचारी बोनसका लागि १ अर्ब १४ करोड ९५ लाख रुपैयाँ छुटयाएको छ । यो रकम अघिल्लो आवको सोही अवधिको तुलनामा ५.६२ प्रतिशतले धेरै हो ।

यस्तै नबिलपछि कर्मचारीलाई बोनसका लागि धेरै रकम छुट्याउनेमा नेपाल इन्भेष्टमेन्ट मेगा बैंक रहेको छ । बैंकले १ अर्ब ६ करोड ७८ लाख रुपैयाँ बोनसका लागि छुट्याएको छ । यो रकम अघिल्लो आवको सोही अवधिको तुलनामा ३०.८९ प्रतिशतले धेरै हो ।
कर्मचारीका लागि अर्ब भन्दा बढी रकम छुट्याउनेमा नबिल र नेपाल इन्भेष्टमेन्ट मेगा बैंक मात्रै हुन् । बाँकी बैंकको अर्ब भन्दा कम छ ।

ग्लोबल आइएमई बैंकले ९७ करोड ६० लाख रुपैयाँ छुट्याएको छ । यो रकम अघिल्लो आवको सोही अवधिको तुलनामा २.५३ प्रतिशतले धेरै हो । यस्तै एभरेष्ट बैंकले ८२ करोड ७१ लाख रुपैयाँ छुट्याएको छ । यो रकम अघिल्लो आवको सोही अवधिको तुलनामा ३२.९८ प्रतिशतले धेरै हो । प्राइम बैंकले कर्मचारीका लागि बोनस बापत ६५ करोड ९८ लाख रुपैयाँ छुटयाएको छ । यो रकम अघिल्लो आवको सोही अवधिको तुलनामा ९.४० प्रतिशतले धेरै हो ।

यस्तै कुमारी बैंकले कर्मचारी बोनसका लागि छुट्याएको रकम ४७.१६ प्रतिशतले बढेर ६४ करोड २३ लाख, लक्ष्मी सनराइज बैंकले कर्मचारी बोनसका लागि छुट्याएको रकम ३५.०९ प्रतिशतले बढेर ६४ करोड ९ लाख, सिद्धार्थ बैंकले कर्मचारीका लागि छुट्याएको रकम १५.५३ प्रतिशतले बढेर ५५ करोड ९६ लाख रुपैयाँ पुगेको छ ।

एनएमबि बैंकले कर्मचारीका लागि छुट्याएको रकम ४०.४४ प्रतिशतले बढेर ५२ करोड १७ लाख, सानिमा बैंकले कर्मचारीका लागि छुट्याएको रकम ६.११ प्रतिशतले बढेर ३९ करोड ५४ लाख, माछापुच्छ्रे बैंकले कर्मचारीका लागि छुट्याएको रकम ४९.६५ प्रतिशतले बढेर ३२ करोड २७ लाख, कृषि विकास बैंकले कर्मचारीका लागि छुट्याएको रकम १०.४७ प्रतिशतले बढेर ३० करोड ७९ लाख, राष्ट्रिय वाणिज्य बैंकले कर्मचारीका लागि छुट्याएको रकम २.९२ प्रतिशतले बढेर २८ करोड ६९ लाख, नेपाल बैंकले कर्मचारीका लागि छुट्याएको रकम ८७.५५ प्रतिशतले बढेर २८ करोड ५४ लाख रुपैयाँ रहेको छ ।

प्रभु बैंकले कर्मचारीको बोनसका लागि भन्दै ७० करोड ५ लाख रुपैयाँ छुट्याएको छ । यो रकम अघिल्लो आवको सोही अवधिको तुलनामा १०.६२ प्रतिशत कम हो । स्टयाान्डर्ड चार्टर्ड बैंकले कर्मचारीका लागि छुट्याएको रकम ३.६६ प्रतिशतले घटेर ५० करोड ६० लाख, नेपाल एसबिआई बैंकले कर्मचारीका लागि छुट्याएको रकम ५.८७ प्रतिशतले घटेर ३० करोड ११ लाख, हिमालयन बैंकले कर्मचारी बोनसका लागि छुट्याएको रकम ४८.४४ प्रतिशतले घटेर २३ करोड १८ लाख, सिटिजन्स बैंकले कर्मचारी बोनसका लागि छुट्याएको रकम ११.९० प्रतिशतले घटेर २० करोड ४२ लाख र एनआईसी एशिया बैंकले कर्मचारी बोनसका लागि छुट्याएको रकम ८८.७८ प्रतिशतले घटेर २ करोड ४० लाख रुपैयाँ मात्रै रहेको छ ।