भारतका सामानमा थप ट्यारिफ लगाउने ट्रम्पको चेतावनी
एजेन्सी । अमेरिकी राष्ट्रपति डोनाल्ड ट्रम्पले भारतीय सामान आयातमा थप ट्यारिफ लगाउने चेतावनी दिएका छन् । उनले भारत राम्रो व्यापारिक साझेदार नभएको उल्लेख गर्दै आफूहरुले भारतसँग धेरै व्यापार नगर्ने समेत बताए ।
“हामीले यसअघि भारतलाई २५ प्रतिशत ट्यारिफ लगाउने निर्णय गरेका थियौं तर मलाई लाग्छ कि अर्को २४ घण्टाभित्र हामी उनीहरूमा त्यसभन्दा धेरै ट्यारिफ लगाउनेछौं ।” ट्रम्पले भारतले रूसबाट निरन्तर तेल किनिरहेको र यसले रूसको युद्ध मेसिनलाई सहयोग पुर्याइरहेको बताएका छन् । साथै यसबाट युक्रेनमा धेरै मानिसहरूको हत्या गरिरहेको समेत उनको भनाइ छ ।
सोमबार पनि डोनाल्ड ट्रम्पले रूसबाट तेल किन्ने कारण भारतमा अझ बढी ट्यारिफ लगाउने चेतावनी दिएका थिए । भारतले पनि यसमा प्रतिक्रिया दिएको थियो । भारतीय विदेश मन्त्रालयले भनेको छ, “अमेरिका अझै पनि रूसबाट आफ्नो आणविक उद्योगका लागि युरेनियम हेक्साफ्लोराइड, इलेक्ट्रिक वाहन उद्योगका लागि प्यालेडियम, मल र रसायन आयात गरिरहेको छ ।”
भारत अहिले रूसी तेलका सबैभन्दा ठूला खरिदकर्तामा पर्छ । सन् २०२२ मा रूसले युक्रेनमा आक्रमण गरेपछि धेरै युरोपेली देशहरूले व्यापार घटाए, जसपछि भारत रूसका लागि एक महत्वपूर्ण बजार बन्यो । डोनाल्ड ट्रम्पले ट्यारिफ कतिले बढाउने कुरा भने पछि खुलासा गरेका भने छैनन् ।
सामाजिक सञ्जाल प्लेटफर्म ट्रुथ सोशलमा गरिएको एक पोस्टमा उनले लेखेका छन्, “भारतले न केवल रूसबाट ठूलो मात्रामा तेल खरिद गरिरहेको छ, तर खरिद गरिएको यो तेलको ठूलो हिस्सा खुला बजारमा बेचेर ठूलो नाफा पनि कमाइरहेको छ । उनीहरूलाई यो कुरा कुनै मतलब छैन कि युक्रेनमा रूसको युद्ध मेसिनले कति मानिसहरूको हत्या गरिरहेको छ । यही कारणले म भारतमा ट्यारिफ बढाउनेछु ।”
यसअघि, ३० जुलाईमा पनि ट्रम्पले भारतमा २५ प्रतिशत ट्यारिफ लगाउने घोषणा गरेका थिए । उनले यो पनि भनेका थिए कि यदि भारतले रूसबाट सैन्य उपकरण र तेल किनिरह्यो भने, हालको ट्यारिफका अतिरिक्त जरिवाना पनि लगाइनेछ । ट्रम्पको आरोप छ कि भारतले तेल किन्दा रूसलाई युक्रेनसँगको युद्ध जारी राख्नमा मद्दत पुगेको छ ।
