२१ सय किलो गाँजा बोकेका ३ जना समातिए
धरान । इटहरी उपमहानगरपालिका–२० तरहरा स्थित धरान–तरहरा सडकबाट २ हजार १०० किलो गाँजासहित तीन जनालाई प्रहरीले नियन्त्रणमा लिएको छ ।
उनीहरुलाई मंगलबार बिहान धरानबाट इटहरी जाँदै गरेको ना।५ ख ६११६ नम्बरको ट्रक रोकेर जाँच गर्ने क्रममा ४८ बोरा बन्दाकोभी र १२ आलुको बोरा बीचमा लुकाइएको अवस्थामा ७० बोरा गाँजा फेला परेको जिल्ला प्रहरीका प्रहरी उपरीक्षक सुमनकुमार तिमल्सिनाले जानकारी दिएका छन् ।
यता, गाँजासहित ट्रक चालक धनकुटा सहिदभूमि गाउँपालिका–६ का ३२ वर्षीय राजेन्द्र राई, ट्रकमा सवार ३३ वर्षीय सुनिल राई र सुनसरीको बराहक्षेत्र नगरपालिका–९ का ३४ वर्षीय सुमन राईलाई प्रहरीले नियन्त्रणमा राखेको हो।
हाल, उनीहरुमाथि लागु औषध सम्बन्धी कसुरमा इलाका प्रहरी कार्यालय इटहरीले अनुसन्धान सुरु गरेको प्रहरी उपरीक्षक तिमल्सिनाले बताएका छन् ।
