सरदरभन्दा १२ दिन ढिलो नेपालबाट बाहिरियो यस वर्षको मनसुन
काठमाडौं । यस वर्षको मनसुन बुधबारदेखि नेपालको सम्पूर्ण भूभागबाट बाहिरिएको छ । मौसम पूर्वानुमानसम्बन्धी निकायका अनुसार नेपालबाट मनसुन बाहिरिने सरदर मिति अक्टोबर २ भए पनि यस वर्ष १२ दिन ढिलो गरी मनसुन बाहिरिएको हो ।
असोज २८ गते (अक्टोबर १४) बुधबार नेपालका सबै भूभागबाट मनसुन बाहिरिएको हो । यसअघि असोज १७ गते (अक्टोबर ३) देखि सुदूरपश्चिम, कर्णाली तथा लुम्बिनी प्रदेशका पश्चिमी भूभागका अधिकांश स्थान र गण्डकी प्रदेशका पश्चिमी भूभागका केही स्थानबाट मनसुन बाहिरिन सुरु भएको थियो ।
मनसुन बाहिरिए पनि स्थानीय वायु तथा पश्चिमी वायुको प्रभाव रहन सक्ने भएकाले मौसममा परिवर्तन आउन सक्ने जनाइएको छ । सम्बन्धित निकायले मनसुन बाहिरिएपछि पनि मौसमसम्बन्धी जोखिम पूर्ण रूपमा समाप्त नहुने भन्दै सर्वसाधारण तथा सरोकारवाला निकायलाई पछिल्लो मौसम पूर्वानुमान र सूचनाबारे जानकारी लिएर आवश्यक सतर्कता अपनाउन अनुरोध गरेको छ ।
