क्रेस्ट माइक्रो लाइफको व्यवसाय सुधार, नाफामा भने ९० प्रतिशतको गिरावट
क्रेस्ट माइक्रो लाइफ इन्स्योरेन्स लिमिटेडलेको व्यवसायमा सुधार भए पनि नाफामा भने उच्च गिरावट देखिएको छ । कम्पनीले सार्वजनिक गरेको गत आर्थिक वर्ष २०८२/८३ को चौथो त्रैमासिकसम्मको अपरिष्कृत वित्तीय विवरण अनुसार व्यवसायमा सुधार देखिए पनि नाफामा भने गिरावट देखिएको हो ।
गत आर्थिक वर्षको असार मसान्तसम्ममा कम्पनीले ४३ करोड ४० लाख १५ हजार रुपैयाँ खुद बीमा शुल्क आर्जन गरेको छ । जुन अघिल्लो आर्थिक वर्षको सोही अवधिको तुलनामा २७.९३ प्रतिशतले बढी हो । अघिल्लो वर्ष कम्पनीले ३३ करोड ९२ लाख ५४ हजार रुपैयाँ बीमा शुल्क संकलन गरेको थियो । समीक्षा अवधिमा कम्पनीको जीवन बीमा कोषमा पनि उल्लेख्य सुधार आएको छ । अघिल्लो वर्ष ८ करोड ८५ लाख ९८ हजार रुपैयाँ रहेको यस्तो कोष १२४.३६ प्रतिशतले वृद्धि भई १९ करोड ८७ लाख ७७ हजार रुपैयाँ पुगेको छ ।
समीक्षा अवधिमा कम्पनीको खुद नाफा भने करिब ९० प्रतिशतले घटेको छ । कम्पनीले गत आर्थिक वर्षको असार मसान्तसम्ममा २५ लाख २६ हजार रुपैयाँ मात्रै खुद नाफा कमाएको छ । जुन अघिल्लो आवको भन्दा ८९.७५ प्रतिशतले कम हो । अघिल्लो आर्थिक वर्ष २ करोड ४६ लाख ४७ हजार रुपैयाँ नाफा कमाएको थियो ।
समीक्षा अवधिमा कम्पनीको कुल खर्च ४९ करोड ८० लाख ३५ हजार रुपैयाँ पुगेको छ । जुन अघिल्लो वर्षको तुलनामा २८.१२ प्रतिशतले बढी हो । नाफा घटेसँगै कम्पनीको प्रतिसेयर आम्दानी (ईपीएस) पनि २.४१ रुपैयाँबाट घटेर ०.३४ रुपैयाँमा खुम्चिएको छ । हाल ७५ करोड रुपैयाँ चुक्ता पुँजी रहेको यस कम्पनीको प्रतिशेयर नेटवर्थ भने १०५.०९ रुपैयाँ कायम भएको छ ।
