ट्रम्पले आफ्नो कार्यकालको पहिलो वर्षमा क्रिप्टोबाट कमाए १ अर्ब डलर
काठमाडौं । अमेरिकी राष्ट्रपति डोनाल्ड ट्रम्पले सन् २०२५ को आफ्नो अनिवार्य वित्तीय विवरण (डिस्क्लोजर) अनुसार गत वर्ष क्रिप्टोकरेन्सी कारोबारबाट १ अर्ब डलर (७५ करोड पाउन्ड) भन्दा बढी आर्जन गरेका छन् । ९२७ पृष्ठ लामो उक्त वित्तीय खुलासाका अनुसार, राष्ट्रपति पदभार ग्रहण गर्नुभन्दा ठीक अगाडि सुरु गरिएको ‘ट्रम्प मीम क्वाइन’ (Meme Coin) बाट मात्रै उनले ६३ करोड ५० लाख डलर रोयल्टी प्राप्त गरेका छन्।
यसैगरी, आफ्ना छोराहरू र उनका विशेष दूत स्टिभ विटकफका सन्तानहरूले स्थापना गरेको क्रिप्टोकरेन्सी कम्पनी ‘वर्ल्ड लिबर्टी फाइनान्सियल’ बाट उनलाई ५० करोड डलरभन्दा बढी आम्दानी भएको विवरणमा उल्लेख छ। ट्रम्पले घरजग्गा व्यवसाय (रियल स्टेट) र आफ्नो नाम जोडिएका विभिन्न ब्रान्डेड सामग्रीको बिक्रीबाट पनि थप लाखौँ डलर कमाएका छन्। यद्यपि, ह्वाइट हाउसले भने उनले राष्ट्रपति पदको फाइदा उठाएर नाफा कमाएको दाबीलाई अस्वीकार गरेको छ।
पछिल्लो वित्तीय विवरणमा देखाइएको यो आम्दानी सन् २०२४ को तुलनामा निकै बढी हो। सन् २०२४ मा ट्रम्पको आम्दानी ६० करोड डलरभन्दा बढी देखिएको थियो। ट्रम्पले आफ्नो व्यवसाय छोराहरूद्वारा सञ्चालित ट्रष्टको मातहतमा सुम्पिएको कुरालाई बारम्बार दोहोर्याउँदै ह्वाइट हाउसले यसमा कुनै पनि प्रकारको ‘स्वार्थको द्वन्द्व’ (कन्फ्लिक्ट अफ इन्ट्रेस्ट) नरहेको दाबी गरेको छ।
ह्वाइट हाउसकी सहायक प्रेस सचिव एना केलीले राष्ट्रपति ट्रम्पले गर्वका साथ अमेरिकालाई “विश्वको क्रिप्टो राजधानी” बनाएको बताएकी छिन्। “राष्ट्रपति वा उनको परिवार कहिल्यै पनि स्वार्थको द्वन्द्वमा संलग्न भएका छैनन् र हुने पनि छैनन्,” उनले जारी गरेको विज्ञप्तिमा भनिएको छ। उनले थपिन्, “राष्ट्रपति ट्रम्प र उनको प्रशासनले चालेका हरेक कदम अमेरिकी जनताको सर्वोत्तम हितमा छन्। यसको विपरीत दाबी गर्ने तथाकथित ‘पत्रकार’ हरूले डेमोक्र्याट र स्थापित सञ्चारमाध्यम (लिगेसी मिडिया) ले एक दशकदेखि फैलाउँदै आएको पुरानै झुटा कथालाई मात्र दोहोर्याइरहेका छन्।”
राष्ट्रपति ट्रम्प स्वयंले पनि आफू संघीय स्वार्थको द्वन्द्वसम्बन्धी कानुनको दायरामा नपर्ने कुरामा जोड दिँदै आएका छन्। कुनै समय ट्रम्पले क्रिप्टोकरेन्सीको कडा आलोचना गर्दै बिटक्वाइनलाई “एक घोटाला” र “कुनै पनि बेला आउन सक्ने महाविपत्ति” को संज्ञा दिएका थिए। तर, मंगलबार सार्वजनिक भएको वित्तीय विवरणले उनको क्रिप्टोबाट भएको आम्दानीले उनको परम्परागत रियल स्टेट व्यवसायलाई समेत धेरै पछाडि पारेको देखाउँछ, जुन व्यवसायले उनलाई पहिलो पटक विश्वमा स्थापित गराएको थियो। विवरण अनुसार, उनले आफ्नो मार-ए-लागो क्लबबाट करिब ७ करोड ७० लाख डलर र फ्लोरिडास्थित डोराल गल्फ क्लबबाट १२ करोड २० लाख डलर कमाएका छन्।
यस्तै, न्युजर्सीको बेडमिन्स्टर, फ्लोरिडाको जुपिटर र स्कटल्याण्डको टर्नबेरीमा रहेका गल्फ क्लबहरूबाट उनले ३ करोड डलरभन्दा बढी कमाएका छन्। यसबाहेक, ट्रम्पले आफ्ना अन्य व्यावसायिक उद्यमहरूबाट पनि लाखौँ डलर आम्दानी गरेका छन्। जसमा ट्रम्प-ब्रान्डेड घडीको रोयल्टीबाट प्राप्त ४७ लाख डलरका साथै ट्रम्प-ब्रान्डेड बाइबल, स्निकर्स (जुत्ता), अत्तर र गितारको बिक्रीबाट प्राप्त रकम समावेश छ।
प्रथम महिला मेलानिया ट्रम्पले पनि २०२५ को आफ्नो वित्तीय विवरण पेस गरेकी छिन्। उनले गत वर्ष सार्वजनिक भएको आफ्नो वृत्तचित्र (डकुमेन्ट्री) सँग सम्बन्धित “लाइसेन्सिङ सम्झौता” बाट १ करोड ७ लाख डलर कमाएकी छिन्। यस्तै, अनलाइनमार्फत बिक्री गरिने डिजिटल एनएफटी (NFT) चित्रहरूको बिक्रीबाट उनलाई थप ६० लाख डलर आम्दानी भएको छ।
राष्ट्रपति ट्रम्पले विभिन्न कानुनी कारबाही र मानहानिका मुद्दाहरूबाट करिब ८ करोड ६५ लाख डलर प्राप्त भएको विवरण पनि पेस गरेका छन्। यसमा एबीसी च्यानलविरुद्धको मुद्दाबाट १ करोड ६० लाख डलर, सीबीएस ब्रोडकास्टिङ र सीबीएस इन्टरएक्टिभबाट १ करोड ६० लाख डलर, मेटाबाट २ करोड ४५ लाख डलर, युट्युबबाट २ करोड २० लाख डलर र एक्स (ट्विटर) बाट ८० लाख डलर समावेश छ।
यद्यपि, ह्वाइट हाउसले यो रकमको ठूलो हिस्सा ट्रम्पको भावी राष्ट्रपतीय पुस्तकालय वा वासिङ्टन डिसी क्षेत्रका पार्कहरूको मर्मतसम्भार गर्ने गैरनाफामूलक संस्थालाई हस्तान्तरण गरिएको स्पष्ट पारेको छ।
फोर्ब्स पत्रिकाका अनुसार हाल ट्रम्पको कुल सम्पत्ति करिब ६ अर्ब डलर पुगेको छ, जुन सन् २०२४ मा २.३ अर्ब डलर मात्र थियो। यता, ब्लूमबर्ग बिलियनियर्स इन्डेक्सले राष्ट्रपतिको कुल सम्पत्ति ७.६ अर्ब डलर आकलन गरेको छ।
ह्वाइट हाउस फर्किएपछि ट्रम्पले क्रिप्टो उद्योगप्रति निकै लचिलो र मैत्रीपूर्ण नीति अपनाएका छन् भने उनको परिवार सम्बद्ध कम्पनीहरूले आफ्नै डिजिटल टोकनहरू समेत जारी गरेका छन्।
ट्रम्पद्वारा नियुक्त गरिएका वित्तीय नियामक निकाय ‘धितोपत्र तथा विनिमय आयोग’ (SEC) का प्रमुखलाई पनि क्रिप्टो उद्योगको सहयोगीका रूपमा हेरिएको छ। सन् २०२५ अप्रिलमा पदभार ग्रहण गरेयता एसईसीका प्रमुख पल एटकिन्सले पूर्ववर्ती नेतृत्वको कडा नियमन र कानुनी डन्डा चलाउने शैलीलाई परिवर्तन गरेका छन्।
गत जुलाईमा राष्ट्रपति ट्रम्पले “डिजिटल सम्पत्तिमा अमेरिकालाई निर्विवाद नेतृत्व दिलाउन” भन्दै ‘जीनियस एक्ट’ (GENIUS Act) मा हस्ताक्षर गरेका थिए।
९०० भन्दा बढी पानाको ट्रम्पको यो वार्षिक वित्तीय विवरण उनका पूर्ववर्ती राष्ट्रपतिको तुलनामा निकै विस्तृत छ। उदाहरणका लागि, पूर्वराष्ट्रपति जो बाइडनले आफ्नो कार्यकालको अन्तिम वर्ष बुझाएको वित्तीय प्रतिवेदन केवल ११ पानाको मात्र थियो।
