नेप्सेमा १ करोड १० लाखभन्दा बढी बोनस सेयर सूचीकृत
काठमाडौं । नेपाल स्टक एक्सचेन्ज (नेप्से)मा सोमबार विभिन्न तीन कम्पनीका १ करोड १० लाख ६० हजार ८१२.९८ कित्ता बोनस सेयर सूचीकृत भएका छन्। नेप्सेका अनुसार सुपर माई हाइड्रोपावर लिमिटेड, नेको इन्स्योरेन्स लिमिटेड र एनएमबि बैंक लिमिटेडले वितरण गरेका बोनस सेयर सूचीकृत भएका हुन्।
सूचीकृत सेयरमध्ये सुपर माई हाइड्रोपावरको २० प्रतिशत बोनसबापत १० लाख ७० हजार कित्ता, नेको इन्स्योरेन्सको तीन प्रतिशत बोनसबापत ८ लाख ७ हजार ४६० कित्ता तथा एनएमबि बैंकको पाँच प्रतिशत बोनसबापत ९१ लाख ८३ हजार ३५२.९८ कित्ता सेयर रहेका छन्।
सूचीकृत भएसँगै सम्बन्धित कम्पनीका बोनस सेयर लगानीकर्ताको हितग्राही खातामा जम्मा भएपछि दोस्रो बजारमा कारोबारका लागि योग्य हुनेछन्।
