लगातार तेस्रोपटक सेमिफाइनलमा भिड्दै इंग्ल्यान्ड र भारत
काठमाडौं । आईसीसी टी–२० विश्वकप २०२६ को दोस्रो सेमिफाइनलमा बिहीबार आयोजक भारतले इंग्ल्यान्डको सामना गर्दै छ । यी दुई टोलीबीचको सेमिफाइनल खेल नेपाली समयम अनुसार बेलुका सवा ७ बजेदेखि मुम्बईको वानखेडे स्टेडियममा सुरु हुनेछ ।
इंग्ल्यान्ड सुपर ८ को समूह २ बाट विजेताका रूपमा तथा भारत समूह १ को उपविजेताका रूपमा सेमिफाइनल खेल्न लागेका हुन् । समूह चरणमा अपराजित रहेको भारतले सुपर ८ मा एक हार बेहोरेको थियो भने इंग्ल्यान्डले समूह चरणमा एक हार बेहोर्दा सुपर ८ मा तीनवटै खेल जितेको थियो ।
इंग्ल्यान्ड र भारत दुवै २–२ पटकको टी–२० विश्वकप क्रिकेटको उपाधि जितिसकेका छन् । यस्तै यी दुई टोली लगातार तेस्रोपटक सेमिफाइनलमा खेल्न लागेका हुन् । यसअघि सन् २०२२ र २०२४ को संस्करणमा पनि यी दुई टोली सेमिफाइनलमा भिडेका थिए ।
सन् २०२२ को सेमिफाइनलमा इंग्ल्यान्डले भारतमाथि १० विकेटको प्रभावशाली जित हासिल गरेको थियो भने २०२४ को सेमिफाइनलमा भारतले शानदार जित हासिल गरेको थियो । यो सेमिफाइनलको विजेता टोली आफ्नो तेस्रो ऐतिहासिक उपाधि जित्ने मार्गमा अघि बढ्नेछन् । फाइनलमा उपाधिविहीन टोली न्युजिल्यान्डसँग भेट हुनेछ ।
