अबदेखि इसेवा वालेटमा रहेको पैसा एनआईसी एसिया बैंकको एटिएमबाट सजिलै झिक्ने मिल्ने
काठमाडौं । अबदेखि इसेवा वालेटमा रहेको पैसा एनआईसी एसिया बैंकको एटिएमबाट झिक्ने मिल्ने भएको छ । बैंकले डिजिटल बैंकिङ सेवा विस्तार गर्दै आफ्ना ग्राहक तथा इसेवा वालेट प्रयोगकर्ताका लागि एटिएम कार्डबिना नै एटिएमबाट रकम निकाल्न मिल्ने सेवा सञ्चालनमा ल्याएको जनाएको छ ।
यस्तो सेवा अब देशभरका ६ सय ७० वटा एनआईसी एसिया बैंकका एटिएममार्फत इसेवा वालेटमा रहेको रकम सहज रूपमा झिक्न सकिने बताइएको छ । यो सेवा डिजिटल कारोबारलाई अझ सरल र सहज बनाउने उद्देश्यका साथ सुरु गरिएको बैंकले जनाएको छ ।
कसरी प्रयोग गर्ने सेवा ?
यस सेवाका लागि प्रयोगकर्ताले आफ्नो इसेवा एपमार्फत ‘Withdraw Fund’अप्सनमा गएर ‘NIC ASIA Bank’ चयन गर्नुपर्नेछ । त्यसपछि १००० रूपैयाँदेखि ५ हजार रूपैयाँसम्मका पूर्वनिर्धारित विकल्पमध्ये रकम छनौट गरी रिमार्क राखेर अगाडि बढ्नुपर्छ । पिन नम्बर राखेपछि प्रयोगकर्ताको मोबाइलमा एक ‘eToken Code’ प्राप्त हुनेछ ।
उक्त कोड लिएर प्रयोगकर्ताले एनआईसी एसिया बैंकको एटिएममा गएर ‘Cardless Withdrawal’अप्सनमा प्रवेश गर्नुपर्नेछ । त्यहाँ ‘eSewa’ विकल्प छान्दै मोबाइलमा प्राप्त ‘eToken Code’ राखेपछि प्रयोगकर्ताले आफूले तोकेको रकम प्राप्त गर्न सक्नेछन् ।
यो सेवाले प्रयोगकर्तालाई दैनिक ५ पटकसम्म कारोबार गर्नको सुविधा दिएको छ, जसमा प्रतिकारोबार ५ हजार रूपैयाँसम्मको रकम निकाल्न सकिने छ। मासिक रुपमा ५० कारोबारसम्म र कुल २५ हजार रुपैयाँसम्म रकम निकाल्न सकिने व्यवस्था रहेको छ।
