एनआइसी एशिया बैंकले चैत २५ गतेदेखि ५० लाख इकाइ ऋणपत्र बिक्री खुला गर्ने
काठमाडौं । एनआइसी एशिया बैंकले चैत २५ गतेदेखि ऋणपत्र बिक्री खुला गर्ने भएको छ । बैंकले १० वर्ष अवधि भएको ‘७ एआइसी एसिया डिबेन्चर २०९१’ निष्काशन गर्न लागेको हो ।
बैंकले प्रतिइकाइ १ हजार रुपैयाँको दरले कुल ५० लाख इकाइ बिक्री खुला गर्न लागेको हो । जसमध्ये ४० प्रतिशत अर्थात २० लाख इकाइ सर्वसाधारणलाई जारी हुनेछ भने ६० प्रतिशत अर्थात् ३० लाख इकाइ व्यक्तिगत तवरबाट बिक्री गरिनेछ ।
सर्वसाधारणमा बाँडफाँड गरिने ऋणपत्रमध्ये १ लाख कित्ता ऋणपत्र सामूहिक लगानी कोषलाई सुरक्षित गरिएको बैंकले बताएको छ । यसमा वार्षिक ७ प्रतिशत ब्याजदर पाइनेछ ।
लगानीकर्ताले न्यूनतम २५ इकाइदेखि अधिकतम २५ लाख इकाईसम्म आवेदन दिन सक्नेछन् ।
यो डिबेन्चरमा चैत २८ गतेसम्म आवेदन दिन सकिन्छ । उक्त समयसम्म सबै इकाइ बिक्री नभएमा भने वैशाख ८ गतेसम्म भर्न सकिनेछ ।
