केप भर्डे विश्वकपको नकआउट चरणमा
काठमाडौं । विश्वकपको इतिहासमा सहभागी हुने तेस्रो सबैभन्दा सानो राष्ट्र केप भर्डेले लगातार तेस्रो खेल पनि बराबरी खेल्दै पहिलो पटक फिफा विश्वकपको नकआउट चरणमा स्थान बनाएको छ। समूह ‘एच’ मा केप भर्डेले साउदी अरेबियासँग गोलरहित बराबरी खेल्दै स्पेनपछि समूह उपविजेताका रूपमा अन्तिम ३२ मा प्रवेश गरेको हो।
‘ब्लु सार्क्स’ उपनामले चिनिने केप भर्डेले पहिलो खेलमा युरोपियन च्याम्पियन स्पेनलाई पनि बराबरीमा रोकेको थियो भने दोस्रो खेलमा उरुग्वेसँग २–२ को बराबरी खेलेको थियो। अन्तिम खेलमा पनि बराबरी गरेपछि स्पेनसँगै नकआउट चरणमा पुग्न सफल भयो। उता, साउदी अरेबिया भने २ अंकसहित समूहको पुछारमा रहँदै प्रतियोगिताबाट बाहिरियो।
पहिलो हाफमा दुवै टोलीले स्पष्ट गोल गर्ने अवसर सिर्जना गर्न संघर्ष गरे। केप भर्डेका जामिरो मोन्टेइरो सबैभन्दा नजिक पुगेका थिए। उनले साउद अब्दुलहमिदलाई छक्याउँदै प्रहार गरेको तल्लो शटलाई साउदी गोलकिपर मोहम्मद अल–ओवाइसले उत्कृष्ट बचाउ गरे।
दोस्रो हाफको सुरुआतमै पनि मोन्टेइरोले अर्को अवसर पाए। वाग्नर पिनाले दायाँबाट दिएको पासमा उनले गरेको प्रहार कमजोर बनेपछि अल ओवाइसले सहजै नियन्त्रणमा लिए। त्यसपछि केभिन पिनाको बायाँ खुट्टाको घुमाउरो प्रहार पोस्टभन्दा थोरैले बाहिरियो। केहीबेरपछि नुनो दा कोस्टाको तीव्र आक्रमणमा लारोस डुआर्टेलाई उत्कृष्ट अवसर मिलेको थियो। तर अल ओवाइसले डुआर्टेको प्रहार विफल पारिदिए।
खेलको अन्तिम समयमा पनि केप भर्डेले अवसर गुमायो। ग्यारी रोड्रिग्सले दायाँबाट उत्कृष्ट क्रस फर्काएपछि नुनो दा कोस्टाले खाली पोस्टतर्फ गरेको प्रहार बाहिरियो। यद्यपि ती अवसर गुमाउँदा पनि केप भर्डेको ऐतिहासिक उपलब्धि रोकिएन। प्रशिक्षक बुबिस्ताको टोलीले अब जुलाई ३ मा मियामीमा साविक विजेता अर्जेन्टिनाविरुद्ध अन्तिम ३२ को खेल खेल्नेछ।
सन् १९९८ को फ्रान्स विश्वकपमा चिलीपछि समूहका सबै खेल बराबरी खेलेर नकआउट चरणमा पुग्ने केप भर्डे पहिलो टोली बनेको छ। समूहको अर्को खेलमा स्पेनसँग १-० ले पराजित भएको उरुग्वे पनि विश्वकपबाट बाहिरिएको छ।
