बुङ्गल हाइड्रोको आईपीओ भर्ने आज अन्तिम दिन
काठमाडौं । बुङ्गल हाइड्रो लिमिटेडले असार २९ गतेदेखि निष्कासन गरेको आईपीओमा पर्याप्त आवेदन नपरेपछि थपेको अवधि आज सकिंदैछ।
कम्पनीले प्रतिकित्ता १०० रुपैयाँका दरले जम्मा २९ लाख ५ हजार कित्ता आईपीओ निष्कासन गर्न नेपाल धितोपत्र बोर्डबाट अनुमति पाएको हो। अहिले कम्पनीले पहिलो चरणमा वैदेशिक रोजगारीमा रहेका नेपालीहरूका लागि २ लाख ७ हजार ५०० कित्ता र आयोजना प्रभावित स्थानीय बासिन्दाहरूका लागि ८ लाख ३० हजार कित्ता आईपीओ निष्कासन गरेको हो।
वैदेशिक रोजगारीमा रहेका नेपालीबाट मागभन्दा बढी आवेदन परेपछि साउन ११ गते नै बन्द भइसकेको छ तर आयोजना प्रभावितबाट पर्याप्त आवेदन नपरेपछि म्याद थपेर आज साउन २६ गतेसम्म कायम गरिएको थियो। त्यसैले आज ५ बजेपछि निष्कासन बन्द हुनेछ।
आयोजना प्रभावितलाई छुट्याइएको शेयरमध्ये पनि ५ लाख ३९ हजार ५०० कित्ता आईपीओमा आयोजना अति प्रभावित क्षेत्रका बासिन्दाले आवेदन दिन पाउनेछन्। यसमा बझाङको बुंगल नगरपालिका वडा नम्बर ६ (साविक पिपलकोट गाविस वडा नम्बर ४, ५ र ७) र वडा नम्बर ७ (साविक कफल्सेरी गाविस वडा नम्बर १) का स्थानीय बासिन्दा रहेका छन्।
त्यस्तै २ लाख ९० हजार ५०० कित्ता आईपीओमा आयोजना सामान्य प्रभावित क्षेत्रका स्थानीय बासिन्दाले आवेदन दिन सक्नेछन्। यसमा बझाङको बुंगल नगरपालिका वडा नम्बर १, २, ३, ४, ५, ८, ९, १० र ११ का स्थानीय बासिन्दा रहेका छन्।
आईपीओमा आवेदन दिंदा कम्तीमा १० कित्ताका लागि आवेदन दिनु पर्नेछ भने बढीमा २० हजार कित्तासम्म माग गर्न सकिने व्यवस्था गरिएको छ।
