वीरगञ्ज नाकाबाट भटमासको कच्चा तेल आयात ५२ अर्ब माथि हुँदा निर्यात ५५ अर्ब
वीरगञ्ज । चालु आर्थिक वर्षको जेठसम्ममा वीरगञ्ज नाका प्रयोग गरेर भटमासको कच्चा तेल ५२ अर्ब ५८ करोड रुपैयाँ मूल्य बराबरको आयात भएको अवस्था छ ।
यता, गत आवको समिक्षा अवधिमा दाँजेर हेर्दा भटमासको कच्चा तेलको आयात ६१३ दशमलव ४१ प्रतिशत अर्थात् ४५ अर्ब २१ करोड रुपैयाँ बढीले आयात भएको हो । त्यस्तो तथ्यांक गत आवको ११ महिनामा भने सात अर्ब ३७ करोड रुपैयाँ मूल्यको मात्रै भटमासको कच्चा तेल आयात भएको थियो । वीरगञ्ज भन्सार कार्यालयका प्रमुख भन्सार प्रशासक दीपक लामिछानेले चालु आवमा यो नाका हुँदै भटमासको प्रशोधित तेल धेरै निर्यात भएको जानकारी दिए। ‘व्यवसायीले भटमासको कच्चा तेल ल्याएर प्रशोधित गरेर फेरि विदेशी मुलुकमा निर्यात गरेको देखिन्छ ।’
वीरगञ्ज नाका हुँदै चालु आवको ११ महिनामा भटमास तेल प्रशोधित निर्यात भने ५५ अर्ब तीन करोड रुपैयाँ मूल्य पर्ने २५ करोड ८८ लाख १४ हजार ७३२ लिटर भटमासको तेल प्रशोधित निर्यात भएको छ ।
जबकी गत आवको सोही अवधिमा भने आठ करोड ८३ लाख रुपैयाँ मूल्य पर्ने चार लाख ६४ हजार १३८ लिटर मात्रै निर्यात भएको थियो । चालु आवको ११ महिनामा यो नाका हुँदै नौ अर्ब ७५ करोड रुपैयाँ मूल्य पर्ने सूर्यमुखी तेलको कच्चा पदार्थ आयात भएको छ । जबकी गत आवको सोही समयमा भने आठ अर्ब चार करोड रुपैयाँ मूल्यको भएको थियो ।
साथै, सोही वीरगञ्ज भन्सार नाका हुँदै चालु आवको ११ महिनामा आठ अर्ब ४० करोड रुपैयाँ मूल्य पर्ने ३ करोड ८८ लाख ९५ हजार ३३९ लिटर सूर्यमुखीको प्रशोधित तेल निर्यात भएको छ । जबकी गत आवको ११ महिनाको अवधिमा रु नौ करोड ९४ लाख मूल्य पर्ने पाँच लाख २७ हजार २९१ लिटर सूर्यमुखीको प्रशोधित तेल निर्यात भएको तथ्यांकमा देखिन्छ ।
