इरानबाट दुई नेपालीलाई उद्धार गरियो
काठमाडौं । पछिल्लो समय तनावग्रस्त बनेसँगै इरानबाट २ जना नेपाली नागरिकको उद्धार गरिएको छ । उक्त नागरिकहरु भारतको दिल्ली आइपुगेको खबर छ।
यता, नेपाली राजदूतावासका अनुसार गणेशप्रसाद पोखरेल र सुमन गैरे मंगलबार दिउँसो नयाँदिल्ली आइपुगेका हुन् । दूतावास र भारतीय विदेश मन्त्रालयले उनीहरूलाई विमानस्थलमा रिसिभ गरेका थिए । दुवै जना बुटवलका रहेको पनि दूतावासले जानकारी दिएको हो।
सोही दूतावासले दुवै जना काठमाडौंका लागि उडिसकेको जनाएको छ । इरानबाट ११ जना नेपालीले नेपाल फर्किन अनुरोध गरेकोमा पहिलो चरणमा दुई जनाको उद्धार गरिएको हो । नेपाल आउन चाहेका सबैजना आइतबार राति नै तेहरानबाट मसद पुगिसकेका हुन् ।
साथै, भारतले आफुले आफ्ना नागरिकको उद्धारका लागि चलाएको अप्रेशन सिन्धु अन्तर्गत नेपाल र श्रीलंकाका नागरिकको पनि उद्धार गर्ने यस अघि जानकारी दिएको थियो । भारतीय विदेश मन्त्रालयले इरानको मसदबाट विशेष विमानमार्फत २८१ भारतीयसहित श्रींलकाका ३ र नेपालका २ जनाको उद्धार गरिएको बताइएको हो।
