युनाइटेडको पुनरागमन जित
काठमाडौं। दुई गोलले पछि परेको अवस्थालाई उल्टाउँदै म्यानचेस्टर युनाइटेडले युइएफए च्याम्पियन्स लिगमा एएस रोमालाई ३–२ गोलले पराजित गरेको छ।
ओल्ड ट्राफोर्डमा मंगलबार राति भएको खेलमा म्याथियस कुन्हाले अन्तिम समयमा लगातार दुई गोल गरेपछि युनाइटेडले रोमाञ्चक जित निकालेको हो।
खेलमा रोमाले सुरुआतदेखि नै घरेलु टोलीलाई दबाबमा राखेको थियो। माटियास सौलेले ११औं मिनेटमा गोल गर्दै रोमालाई अग्रता दिलाए। त्यसको सात मिनेटपछि डोनेल मालेनले पेनाल्टीमार्फत गोल गरेपछि रोमा २–० ले अघि बढ्यो।
दुई गोलले पछि परेपछि युनाइटेडले खेलमा फर्कने प्रयास तीव्र बनायो। कप्तान ब्रुनो फर्नान्डेसले ५८औं मिनेटमा पुनः प्रहार गरिएको पेनाल्टीमा गोल गर्दै टोलीलाई खेलमा फर्काए।
खेल सकिन सात मिनेट बाँकी रहँदा कुन्हाले बराबरी गोल गरे। त्यसको तीन मिनेटपछि उनले व्यक्तिगत दोस्रो गोल गर्दै युनाइटेडलाई ३–२ को अग्रता दिलाए।
तर कुन्हाको खुसी लामो समय टिकेन। निर्णायक गोलपछि जर्सी खोलेर समर्थकको प्यारापिटमा पुगेका कारण उनले पहेँलो कार्ड पाएका थिए। इन्जुरी समयमा विपक्षी खेलाडीमाथि ढिलो ट्याकल गरेपछि उनले रातो कार्ड पाएर मैदान छाड्नुपर्यो।
खेलअघि नै युनाइटेडका समर्थकले क्लबको पुरानो रङ हरियो र सुनौलो बेलुन उडाएर विरोध जनाएका थिए। पहिलो हाफमा समर्थकले मैदानमा दर्जनौं पहेँला टेनिस बलसमेत फ्याँकेका थिए।
