नेपाल र बंगलादेश हाई पर्फर्मेन्स भिड्दै
काठमाडौं। नेपालले टप एन्ड टी–२० सिरिजमा शनिबार बंगलादेश हाई पर्फर्मेन्स ११ को सामना गर्दैछ। डार्विनस्थित मरारा ओभलमा हुने खेल नेपाली समयअनुसार दिउँसो २:१५ बजे सुरु हुनेछ।
नेपाल प्रतियोगितामा पहिलो जितको खोजीमा छ। पहिलो खेलमा नेपाल एनटी स्ट्राइकर्ससँग ८ विकेटले पराजित भएको थियो। उक्त खेलमा नेपालको ब्याटिङ अपेक्षाअनुसार चल्न सकेन।
पवन सर्राफले ४१ रन बनाएर एनटी स्ट्राइकलाई १२३ रनको सामान्य लक्ष्य दिएका थिए। तर, एनटी स्ट्राइकले उक्त लक्ष्य १५ ओभरमा दुई विकेट गुमाउँदै सहजै पूरा गरेको थियो। ती दुवै विकेट पवनले नै लिएका थिए।
नेपालले बंगलादेश हाई पर्फर्मेन्सविरुद्ध ब्याटिङमा सुधार गर्दै बलियो प्रदर्शन गर्ने लक्ष्य राखेको छ। गत वर्षको भेटमा बंगलादेश ‘ए’ले नेपाललाई ३२ रनले पराजित गरेको थियो। त्यसैले नेपालका लागि आजको खेल गत हारको बदला लिने र प्रतियोगितामा पुनरागमन गर्ने अवसरसमेत हुनेछ।
नेपालले ब्याटिङमा जिम्मेवार सुरुआत गर्दै मध्यक्रमबाट ठूलो योगदान निकाल्न सके जितको सम्भावना बलियो बन्नेछ। बलिङमा पनि सुरुआती ओभरमै दबाब सिर्जना गर्नु नेपालको मुख्य प्राथमिकता हुनेछ।
