युनाइटेड अजोडको बीमा व्यवसाय मजबुत, एक वर्षमा कमायो ६ करोड बढी नाफा
काठमाडौं । युनाइटेड अजोड इन्स्योरेन्स कम्पनीको व्यवसाय मजबुद देखिएको छ । यद्यपी कम्पनीको नाफा भने घटेको छ । कम्पनीले सार्वजनिक गरेको गत आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण अनुसार नाफामा साढे ६४ प्रतिशतको गिरावट आएको छ ।
कम्पनीले गत आर्थिक वर्षको अन्तिमसम्ममा कुल ६ करोड ३० लाख ९९ हजार रुपैयाँ नाफा कमाएको छ । यो अघिल्लो आवको भन्दा ६४.५५ प्रतिशतले कम हो । अघिल्लो आर्थिक वर्ष कम्पनील्े १७ करोड ८० लाख रुपैयाँ नाफा आर्जन गरेको थियो । समीक्षा अवधिमा कम्पनीको खुद बीमाशुल्क आर्जन अघिल्लो वर्ष १ अर्ब २३ करोड ९६ लाख रुपैयाँ रहेकोमा ७.९० प्रतिशतले बढेर १ अर्ब ३३ करोड ७६ लाख रुपैयाँ पुगेको छ । त्यस्तै समीक्षा अवधिमा कम्पनीको कुल खर्च ४.९४ प्रतिशतले बढेर १ अर्ब ७१ करोड ५० लाख रुपैयाँ पुगेको छ भने लगानीबाट हुने आम्दानी ९ प्रतिशतले घटेर १ अर्ब ८० करोडरुपैयाँमा खुम्चिएको छ ।
कम्पनीको चुक्ता पुँजी २ अर्ब ३१ करोड लाख रुपैयाँ पुगेको छ । बीमा कोषको आकार २३.९० प्रतिशतले बढेर ३ अर्ब ५९ करोड ६ लाख रुपैयाँ पुगेको छ । नाफामा आएको गिरावटसँगै कम्पनीको प्रतिसेयर आम्दानी (ईपीएस) मा पनि गिरावट लागेको छ । अघिल्लो वर्ष ७.७१ रुपैयाँ रहेको प्रतिसेयर आम्दानी २.७३ रुपैयाँमा झरेको छ । हाल कम्पनीको प्रतिसेयर नेटवर्थ १८८.०१ रुपैयाँ रहेको छ ।
