गभर्नर पौडेलले भेटे बैंक, वित्तीय संस्था र उद्योगी व्यवसायीका प्रतिनिधि
काठमाडौं । नेपाल राष्ट्र बैंकका गभर्नर प्रा. डा. विश्वनाथ पौडेलले जेनजी आन्दोलनको असरबारे बुझ्न बैंक तथा वित्तीय संस्थासम्बद्ध एसोसिएसनका प्रतिनिधि र उद्योगी व्यवसायीका प्रतिनिधिहरूसँग छुट्टाछुट्टै छलफल गरेका छन् ।
सोमबारबाट सुरु भएको आन्दोलनले मंगलबार खर्बौं खर्बको क्षति पुर्याएको छ । मंगलबार आन्दोलनकारीले निजी क्षेत्रलाई छानिछानी आक्रमण गरेका छन् । आक्रमणकारीले २ दर्जनभन्दा बढी होटलमा तोडफोड तथा आगजनीले २५ अर्बभन्दा बढी क्षति भएको होटल संघले जनाएको छ । आन्दोलनकारीले निजी उद्योगी व्यवसायीको घर तथा व्यवसायीमा छानिछानी तोडफोड गरेका छन् । भाटभटेनी २१ वटा स्टोरमा आन्दोलनकारीले क्षति पुर्याए । १२ वटामा पूर्ण ध्वस्त भएका छन् । उद्योगी विनोद चौधरी, उद्योग वाणिज्य महासंघका पूर्वअध्यक्ष शेखर गोल्छाको घरमा आक्रमण गरेका छन् । विभिन्न गाडीका सोरुम तोडफोड गरेका छन्। आन्दोलनकारीले वाणिज्य बैंकको बानेश्वर शाखामा लुटपाट गर्नुका साथै करिब ५ दर्जन एटिएम बुथमा लुटपाट गरेका छन् ।
यही बीचमा गभर्नर पौडेलको घरमा पनि आक्रमणकारीले तोडफोड तथा आगजनी गरेका छन् । गभर्नर पौडेलको ललितपुर र चितवनमा रहेको घरमा आगजनी गरेका छन् ।आफ्नो घर जलेको पीडा भुलेर गभर्नर पौडेलले शुक्रबार मध्याह्न बैंक तथा वित्तीय संस्था र उद्योग व्यवसायीका प्रतिनिधिलाई बोलाएर छलफल गरेका छन् ।
