कोटेश्वर भाटभटेनीमा लुटपाट र तोडफोडको प्रतिकार गर्ने सुरक्षा गार्डलाई ५ लाख नगदसहित सम्मान
काठमाडौं । कोटेश्वरस्थित भाटभटेनीमा कार्यरत सुरक्षा गार्ड दुलप्रसाद पराजुलीलाई भाटभटेनीका सञ्चाल मीनबहादुर गुरुङले ५ लाख नगदसहित सम्मान गरेका छन् । चैत १५ गते राजावादी प्रदर्शन क्रममा प्रदर्शनकारीहरुले कोटेश्वरस्थित भाटभटेनी सुपरस्टोर पुगेर तोडफोड र लुटपाट गरेका थिए । त्यसको प्रतिकारमा खरो उत्रिएका गार्ड पराजुली सम्मानित भएका हुन् ।
बुधबार आयोजित विशेष समारोहमा सञ्चालक गुरुङले सुरक्षा गार्ड पराजुलीलाई ५ लाख १ हजार १ सय ११ नगद पुरस्कार, एक फूली र पाँच ग्रेड बढुवासहित सम्मान प्रदान गरे । पराजुली २२ वर्षदेखि भाटभटेनीमा कार्यरत छन् ।
भाटभटेनीले इन्जिनियर सुवर्ण डंगोल, परशुराम थारू, आयुष थारू, शान्तराम थारू, नवीन थारू, प्रेम थारू, रामदास थारूलगायतका कर्मचारी पनि ५ हजार नगदसहित सम्मान गरेको छ ।
यसैबीच मृत्यु भएका पत्रकार सुरेश रजक र सवारी चालक मजदुर सविन महर्जनको परिवारलाई आर्थिक राहतको घोषणा गरिएको छ । गुरुङले सुरेशको परिवारलाई ५ लाख रुपैयाँ र सविनको परिवारलाई ३ लाख दिने घोषणा गरेका छन् ।
