एलआइसी विश्वमै ‘टप थ्री ब्राण्ड’ को रुपमा स्थापित हुँदा, ब्राण्ड भ्यालू ३६ प्रतिशतले उचालियो

काठमाडौं । ब्राण्ड मूल्याङ्कन परामर्शदाता ब्राण्ड फाइनान्सले सन् २०२५ का लागि प्रकाशित गरेको नयाँ रिपोर्ट पछिल्लो समय चर्चामा छ । सोही ब्राण्ड फाइनान्स इन्स्योरेन्स १०० को रिपोर्ट अनुसार भारतीय जीवन बीमा निगम एलआइसीले १०० पूर्णाङ्कमा मापन गरिने ब्राण्ड स्ट्रेन्थ इन्डेक्स अन्तर्गत ८८ स्कोर प्राप्त गरी तेस्रोमा पर्न सफल भएको हो ।

सोही बेलामा एलआइसीभन्दा अगाडि पोल्यान्डको पिजेडयु र चाइनाको चाइना लाइफ बीमा कम्पनीले क्रमश ९४.४ र ९३.५ अंकका साथ पहिलो र दोस्रो स्थानमा छन् भने अस्ट्रेलियाको निर्र्जीवन बीमा कम्पनी एनआरएमआर ८७.२ अङ्कको साथ एलआइसीलाई पछ्याइरहेको अवस्था प्रकाशित विश्व प्रसिद्ध तथ्यांकमा देखिन्छ ।

त्यस्तै, बलियो ब्राण्डको चिनारी दिँदै विश्वव्यापी रुपमा छाउन सफल एलआइसीले विश्वकै तेस्रो बलियो ब्रान्डको रूपमा मान्यता पाएसँगै उक्त कम्पनी प्रति बीमितको विश्वासमा समेत ह्वात्तै वृद्धि भएको अवस्था छ । त्यस्तो बेलामा गरिएको सर्वेक्षणमा उक्त श्रेणीमा एलआइसी उक्लिन सफल हुनुको पछाडि उक्त कम्पनीको बजारमा बलियो उपस्थिति र उक्त कम्पनीप्रति ग्राहकको बढ्दो विश्वासलाई नै मुख्य आधार मानिएको छ । यसको मतलब विश्वास माथि विश्वासको धारा बगाउन सक्ने बीमा कम्पनी नै विश्व प्रसिद्ध बन्न सक्छन् । यस प्रभावशाली वृद्धिले गर्दा कम्पनीले विश्वव्यापी रुपमा सबैभन्दा मूल्यवान बीमा ब्रान्डहरूमध्ये ६ स्थान माथि उक्लिएर बाह्रौं स्थान हाँसिल गरेको छ । एलआइसीको यस उपलब्धि विमितको विश्वास र बजार अनुकूल पोलिसी निर्माणको जगमा उभिएको मान्न सकिन्छ ।

वित्तीय क्षेत्रमा, एलआईसीले डिसेम्बर, २०२४ त्रैमासिकको लागि स्ट्यान्डअलोन खुद नाफामा वार्षिक रूपमा १७ प्रतिशतले वृद्धि भएको रिपोर्ट गरेको थियो, जुन अघिल्लो वर्षको भारु ९४४४.४२ करोडको तुलनामा भारु ११०५६.४७ करोड पुगेको छ । यस्तो वृद्धिलाई व्यवस्थापन खर्चमा आएको गिरावट (विशेष गरी कर्मचारी व्यवस्थापन सम्बन्धि लागत) मा आएको गिरावटले समर्थन गरेको छ । समेकित आधारमा, एलआइसको खुद नाफा १६ प्रतिशतले बढेर भारु ११००९ करोड पुगेको छ, जुन एक वर्ष अघि मात्र भारु ९४६९ करोड थियो ।

एलआइसी र विशाल (ग्रुप) समूहको संयुक्त उद्यमको रुपमा एलआइसी नेपाल
भारत सरकारको स्वामित्वमा रहेको एलआइसीको नेपालमा रहेको अग्रणी जीवन बीमा संस्था एलआइसी नेपालमा पनि ५५ प्रतिशत लगानी रहेको छ । कम्पनी ऐन वि सं २०५३ अनुसार सन् २००० मा विशाल समूहसँग मिलेर स्थापना भएको एलआइसीले सेप्टेम्बर २००१ बाट काम सञ्चालन गरेको थियो । सोहीे समूहको २५ प्रतिशत सेयर र सार्वजनिक समूहको २० प्रतिशत सेयर कायम राखि खोलिएको थियो । नेपालमा एलआइसीले विभिन्न किसिमका बीमा योजना प्रवर्तन गरेको छ। जसमध्ये जीवन उत्सव, जीवन मधुर, जीवन बचत, जीवनसाथी, बालउन्नति आदि लोकप्रिय मानिन्छन् । उच्च सुनिश्चित लाभ बोनस दर को कारणले गर्दाखेरि पनि बीमितहरूको यस बीमा कम्पनीप्रति आकर्षण बढ्दो छ। जीवन आस्था योजना यस्तो बिमा आयोजना हो जसले पाँच वर्षको अवधिमा ८५ रुपैयाँ सम्मको उच्च लाभ सुनिश्चित गर्दछ ।

सन् २०२३ मा इक्रा नेपाल ले अनुभवी बोर्ड सदस्यहरू, व्यवस्थापन समूह, नियन्त्रित लागत, मितव्ययी खर्च व्यवस्थापन, उत्कृष्ट सूचकहरू र राम्रो नाफा, सञ्चालकहरूको लामो अनुभव, भारतीय बीमा निगमको ५५ प्रतिशत स्वामित्व जस्ता कुराहरूलाई आधार मानेर ‘ए’ रेटिङ प्रदान गरेको थियो । त्यस्तै पाँचौं राष्ट्रिय कर दिवस वि.स. २०८०मा नेपाल सरकारले एलआइसी नेपाललाई २०७८÷७९ मा सबैभन्दा बढी कर दाखिल गर्ने भनेर सम्मानित पनि गरेको थियो। यस्ता यावत कुराहरूले गर्दा पनि एलआइसी नेपाललाई आफ्नो ब्रान्ड मूल्य विस्तार गर्न सहज भइरहेको छ ।

(रिफ्रेन्स:विदेशी एजेन्सीहरुबाट)