विश्वका सय उत्कृष्ट बीमा कम्पनीहरूको सूची सार्वजनिक, एलआईसी विश्वकै तेस्रो बलियो ब्राण्ड

यस्ता छन् विश्वका टप टेन कम्पनीहरू

काठमाडौं । बेलायत स्थित ब्राण्ड फाइनान्सले ब्रान्ड फाइनान्स इन्स्योरेन्स १०० रिपोर्टको सन २०२५ संस्करण प्रकाशित गरेको छ । सो अध्ययनले एक सय ठूला बीमा कम्पनीहरूलाई तिनीहरूको मूल्याङ्कन अनुसार स्थान दिएको हो ।

सन २०२५ मा, शीर्ष दश बीमा कम्पनीहरू मध्ये नौ कम्पनिले आफ्नो मूल्याङ्कनमा वृद्धि गरेका छन् । शीर्ष दशमा पर्न सफल बीमा कम्पनीहरु मध्ये तीनवटा चाहीँ चीनको र चारवटा चाहीँ अमेरिकाको रहेका छन् ।

बीमा कम्पनीको ब्रान्ड मूल्य विश्लेषण

चीनको पिंग एन इन्स्योरेन्स ३३ दशमलव ६ अर्ब अमेरिकी डलर मूल्य र जर्मनीको एलियान्ज २६ दशमलव ७ अर्ब अमेरिकी डलर मूल्य सहित विश्वकै सबैभन्दा मूल्यवान बीमा कम्पनी लिस्टमा क्रमशः पहिलो र दोस्रो स्थान कायम राखेका छन् । त्यस्तै, फ्रान्सेली बीमा कम्पनी एएक्सए ले चौथो स्थानमा रहेको चाइना लाइफलाई उछिन्दै तेस्रो स्थानमा उक्लिन सफल भएको छ ।

इटलीको जेनेराली र अमेरिकाको अल स्टेट यस्ता दुई बीमा कम्पनीहरु हुन् जसको स्थान २०२४ मा शीर्ष १० मा परेको थिएन तर पनि तिनीहरूको बलियो क्षेत्रीय विस्तार, आम्दानीमा सुधार, उत्कृष्ट व्यवस्थापन, कम्पनीको ग्राहकप्रतिको बफादारिता अनि सम्पति तथा दुर्घटना बीमा उद्योगमा ल्याइएको आकर्षक पोलिसी विस्तारले २०२५ मा शीर्ष १० स्थानमा पर्न सफल भएका छन् । ती कम्पनीमा उच्च वृद्धि देखिएको छ। जेनेराली बीमा कम्पनीमा र अलस्टेट बीमा कम्पनीको ब्रान्ड मूल्य क्रमश ४७ प्रतिशत र ३५ प्रतिशत ले वृद्धि भएको देखिन्छ ।

बीमा कम्पनीको ब्राण्ड शक्ति विश्लेषण
कुनै पनि बीमा कम्पनीको ब्राण्ड शक्ति निर्धारण गर्ने विभिन्न पक्षहरू हुने गर्छन्। जसमध्ये कम्पनीको वित्तीय स्थिरता मूल्याङ्कन, पुँजी सञ्चिति, नाफा, परिचालन दक्षता ,दाबी व्यवस्थापन, बीमाङ्कन, ग्राहक धारण ब्राडको जागरुकता, विश्वास, कभरेज, ग्राहक सेवा, जोखिम व्यवस्थापनका अभ्यासहरू जस्ता पक्षहरू हुने गर्छन्। विश्वका १०० बीमा कम्पनीहरू मध्ये पोल्यान्डको पीजेडयू बीमा कम्पनी ९४ दशमलव ४ ब्रान्ड स्ट्रेन्थ इन्डेक्स बिएसआई स्कोरको साथ बलियो बीमा ब्रान्डहरूको सूचीमा शीर्ष स्थानमा परेको छ ।

त्यस्तै चाइना लाइफ इन्स्योरेन्स १०० मध्ये ९३ दशमलब् ५ को ब्रान्ड स्ट्रेन्थ इन्डेक्स बिएसआई स्कोरको साथ एएएप्लस रेटिङ राखेको छ। पिजेडयू जस्तै यो पनि मुख्यत घरेलु बजारमा सञ्चालित हुन्छ जहाँ यसले आफ्नो राम्रो परिचयता कमाएको छ। देशको जीवन बीमा क्षेत्रमा यसको प्रमुख उपस्थितिले “मलाई राम्रोसँग थाहा भएको बिमा कम्पनी” भनेर ग्राहकहरूमाझ राम्रोसँग परिचित हुन सकेको छ ।

ब्रान्ड मूल्य र ब्राण्ड स्ट्रेन्थ शीर्षकको उत्कृष्ट १० सूचीमा चाइनालाईफ, पिआईसीसी, पेङ्गन जस्ता तीनवटा बीमा कम्पनीले मात्र परस्पर उपस्थिति कायम राख्न सफल भएका छन्। रिपोर्ट अनुसार भारतीय जीवन बीमा एलआइसीले ८८ ब्रान्ड स्ट्रेन्थ इन्डेक्स बीएसआईप्राप्त गर्न सफल भएको छ । यससँगै एलआइसीले विश्वकै तेस्रो बलियो ब्रान्डको रूपमा मान्यता पाएको छ। भारत सरकारको स्वामित्वमा रहेको एलआइसी बीमा कम्पनीले नेपालमा पनि एलआइसी नेपाल  नाममा शाखा विस्तार गरी सन् २००१ देखि बीमाको काम सञ्चालन गरिरहेको छ ।

(रिफ्रेन्स :विभिन्न न्युज एजेन्सीहरुबाट)