काठमाडौं विश्वविद्यालयको उपकुलपतिमा प्रा.डा. विवेक बराल नियुक्त
काठमाडौं । काठमाडौं विश्वविद्यालय (केयू)को उपकुलपतिमा प्रा.डा. विवेक बराल नियुक्त भएका छन्। विश्वविद्यालयका कुलपतिसमेत रहेका प्रधानमन्त्री बालेन शाहले बराललाई उपकुलपतिमा नियुक्त गरेका हुन्। शिक्षा तथा खेलकुदमन्त्री सस्मित पोखरेलको अध्यक्षतामा गठित सिफारिस समितिले बरालको नाम उपकुलपतिका लागि सिफारिस गरेको थियो। बराल केयूको मेकानिकल इन्जिनियरिङ विभागका प्राध्यापक हुन्।
बराल काठमाडौं विश्वविद्यालयमै अध्ययन गरी सोही विश्वविद्यालयको उपकुलपति बन्ने पहिलो व्यक्ति हुन्। उनले केयूबाट मेकानिकल इन्जिनियरिङमा स्नातक, जापानको टोकियो विश्वविद्यालयबाट स्नातकोत्तर र न्युजिल्यान्डको अकल्यान्ड विश्वविद्यालयबाट विद्यावारिधि (पीएचडी) गरेका छन्।
बरालको विज्ञता इन्धन तथा ऊर्जा, दहन विज्ञान तथा वातावरणीय प्रदूषण, थर्मोफ्लुइड इन्जिनियरिङ र कम्प्युटेसनल फ्लुइड डाइनामिक्सलगायत क्षेत्रमा रहेको छ। उनी केयूमा उपप्राध्यापक, सहप्राध्यापक हुँदै प्राध्यापक बनेका हुन्। उनले काठमाडौं विश्वविद्यालयमा ऊर्जा, वातावरण, बायोमासबाट ऊर्जा, थर्मोडाइनामिक्स, फ्लुइड मेकानिक्स, हिट ट्रान्सफर, इन्टरनल कम्बसन इन्जिन तथा हिट एन्ड पावर इन्जिनियरिङलगायत विषय अध्यापन गर्दै आएका छन्।
केयूको उपकुलपतिका लागि ३५ जनाले आवेदन दिएका थिए। आवेदन दिएका उम्मेदवारमध्ये १० जनाको छोटो सूची सार्वजनिक गरिएको थियो। छोटो सूचीमा परेकाहरूको प्रस्तुतिकरण तथा अन्तर्वार्तापछि मेरिटका आधारमा बरालको नाम उपकुलपतिका लागि सिफारिस गरिएको समितिले जनाएको छ।
