एशियन डेभलपमेण्ट बैंकले नेपाललाई दियो १ खर्ब बढी ऋण तथा सहयोग
काठमाडौं । नेपालललाई एसियाली विकास बैंक एडिबीले १ खर्ब ५ अर्ब ६१ करोड रुपैयाँ सहयोग दिने पक्कापक्की भएको छ। सो सहयोगमध्ये ६ अर्ब ५२ करोड अनुदान हो भने बाँकी रकम सहुलियतपूर्ण ऋण हो ।
यता काठमाडौं उपत्यका खानेपानी आपूर्ति सुधार परियोजना, दक्षिण एसिया उपक्षेत्रीय आर्थिक सहयोग सासेक विद्युत् प्रसारण तथा वितरण सुदृढीकरण परियोजना तथा समावेशी विकास कार्यक्रम कार्यान्वयन गर्न उक्त ऋण एवं अनुदान उपयोग गरिने जनाइएको छ।
सोही विषयमा अर्थ मन्त्रालयमा शुक्रबार आयोजित कार्यक्रममा ऋण एवं अनुदान सहायतासम्बन्धी सम्झौतापत्रमा अर्थसचिव डा. रामप्रसाद घिमिरे तथा एडिबीका देशीय निर्देशक आर्नो कोश्वाले हस्ताक्षर गरेका हुन् भने सचिव घिमिरेले नेपालको समाजिक आर्थिक विकासमा एडिबीबाट प्राप्त सहयोगका निम्ति कृतज्ञता व्यक्त गरेका थिए।
कार्यक्रममा निर्देशक कोश्वाले नेपालको कृषि, प्राकृतिक स्रोत, ग्रामीण विकास, ऊर्जा, सार्वजनिक क्षेत्र व्यवस्थापन, खानेपानी, एवं सहरी पूर्वाधार निर्माणमा एडिबीले सघाउँदै आएकोमा जोड दिएका थिए ।
