७ महिनामा वाणिज्य बैंकहरुले कमाए ३८ अर्ब नाफा, कुन बैंकको कति ? 

काठमाडौं ।  चालु आर्थिक वर्ष २०८२/०८३ को ७ महिनामा वाणिज्य बैंकहरुले ३८ अर्बभन्दा बढी मुनाफा आर्जन गरेका छन् । नेपाल राष्ट्र बैंकले सार्वजनिक गरेको चालु आर्थिक वर्षको माघ मसान्तसम्मको तथ्याङ्क अनुसार २० वाणिज्य बैंकहरुले ३८ अर्ब १ करोड ६६ लाख ८० हजार रुपैयाँ नाफा कमाएका हुन् ।

चालु आर्थिक वर्षको ७ महिनामा बैंकहरुले आर्जन गरेको नाफा गत आर्थिक वर्षको सोहि अवधिको तुलनामा ५.४० प्रतिशतले बढी हो । गत आर्थिक वर्षको ७ महिनामा वाणिज्य बैंकहरुले ३६ अर्ब ६ करोड ७९ लाख रुपैयाँ नाफा आर्जन गरेका थिए । चालु आर्थिक वर्षको ७ महिनाको तथ्याङ अनुसार १० बैंकको नाफा बढेको छ भने १० बैंकको नाफा घटेको छ । यसअवधिमा सर्वाधिक नाफा आर्जन गर्नेमा नबिल बैंक पहिलो नम्बरमा रहेको छ । बैंकले ७ महिनामा नाफा ३४.२१ प्रतिशतले बढाएर ५ अर्ब ३८ करोड ३१ लाख रुपैयाँ पुराएको हो । गत आर्थिक वर्षको सोहि अवधिमा बैंकको नाफा ४ अर्ब १ करोड रुपैयाँ रहेको थियो । चालु आर्थिक वर्षको माघ मसान्तसम्ममा नाफामा दोस्रो नम्बरमा रहेको ग्लोबल आईएमई बैंकको नाफा ६.६२ प्रतिशतले बढेर ४ अर्ब १४ करोड रुपैयाँ रहेको छ ।

समिक्षा अवधिमा सर्वाधिक नाफा वृद्धि गर्नेमा बैंकमा भने कुमारी बैंक र सिद्धार्थ बैंक अगाडी देखिएका छन् । कुमारीको नाफा ३२९ प्रतिशतले बढेर ३ अर्ब १७ करोड पुगेको छ भने सिद्धार्थ बैंकको ९९ प्रतिशतले बढेर १ अर्ब ७० करोड रुपैयाँ पुगेको हो ।

माघ मसान्तसम्मको अवधिमा एभरेष्ट बैंकको नाफको नाफा २.६६ प्रतिशतले घटेर २ अर्ब ५० करोड, प्राइम बेंकको ९.८१ प्रतिशतले बढेर २ अर्ब ३९ करोड, इन्भेष्टमेन्ट मेगा बैंकको ३६.१८ प्रतिशतले घटेर २ अर्ब १९ करोड, एनएमबि बैंकको ९.८१ प्रतिशतले घटेर २ अर्ब १३ करोड, राष्ट्रिय वाणिज्य बैंकको ५२.४६ प्रतिशतले बढेर १ अर्ब ८८ करोड, नेपाल बैंकको २४.४० प्रतिशतले घटेर १ अर्ब ८५ करोड, सानिमा बैंकको २६.२८ प्रतिशतले बढेर १ अर्ब ७३ करोड, स्टान्र्डड चार्टड बैंकको १५.१५ प्रतिशतले घटेर १ अर्ब ५६ करोड र हिमालयन बैंकको ५.१७ प्रतिशतले घटेर १ अर्ब ३९ करोड रुपैयाँमा पुगेको छ ।

यता, प्रभु बैंकको २५.६६ प्रतिशतले घटेर १ अर्ब ३६ करोड, माछापुच्छ्रे बैंकको २८.६३ प्रतिशतले बढेर १ अर्ब २४ करोड, कृषि विकास बैंकको ७.५० प्रतिशतले बढेर १ अर्ब २० करोड, नेपाल एसबिआई बैंकको १०.६१ प्रतिशतले बढेर १ अर्ब २० करोड, सिटिजन्स बैंकको ३६.०९ प्रतिशतले घटेर ५७ करोड, एनआईसी एशिया बैंकको ४.६६ प्रतिशतले घटेर ४४ करोड र लक्ष्मी सनराइज बैंकको ८४.७३ प्रतिशतले घटेर २४ करोड रुपैयाँ नाफा रहेको छ ।