आगामी पुस ९ गतेबाट पोखरामा ‘हट एयर बेलुन फेस्टिभल’ आयोजना हुने
काठमाडौं । अब नेपालमा पनि अन्तर्राष्ट्रिय हट एयर बेलुन फेस्टिभल हुने भएको छ । सो पर्व यही डिसेम्बर २४ पुस ९ गतेदेखि पोखरामा मनाइने भएको हो।
सो फेस्टीबल बेलुन नेपाल प्रालिको आयोजनामा हुनेछ भने त्यसका लागि पोखराको पामे फाँटलाई आयोजना स्थल तोकिएको छ ।
सोही अवसरमा २० देशबाट व्यावसायिक बेलुन कम्पनी सहभागिता हुनेछन् । क्रिसमस तथा अंग्रेजी नयाँ वर्षको अवसरमा आयोजना गरिएको सो पर्व २०२५ को पहिलो दिन १ जनवरीसम्म जारी हुने फेस्टिभलका इन्टरनेसनल संयोजक रोबर्ट विकले बताउँछन् ।
उक्त फेस्टिभलको व्यवस्थापन क्रिज्म्याटिक डिजिटल सोलुसनले गर्नेछ भने नेपाल टुरिजम बोर्ड, गैरआवासीय नेपाली संघ र पोखरा टुरिजम बोर्डबाट कार्यक्रमको प्रवर्द्धन हुनेछ।
सोही फेस्टिभलको ब्रान्ड एम्बासडरमा अभिनेता राजेश हमाल र अभिनेत्री प्रियंका कार्की छन् भने फेस्टिभलको अन्तर्राष्ट्रिय संयोजनतर्फ दीपक श्रेष्ठ र रोबर्ट विक हुने जनाइएको छ।
यस अघि बेलुन नेपाल प्रालिले गएको वर्ष फेब्रुअरीमा थाइल्याण्डमा ‘इन्टरनेसनल बलुन फियस्ता, २०२४’ मा समेत सहभागीता जनाएको अयोजकहरुले जानकारी दिएका छन् ।
