अब घरजग्गा कारोबार गर्न लाइसेन्स चाहिने
काठमाडौं । आगामी दिनमा घरजग्गा खरिद–बिक्रीका लागि नयाँ व्यवस्था लागू भएको छ । त्यस्तो व्यवस्था अनुसार घर जग्गा व्यवसाय गर्न चाहनेले अनिवार्य रूपमा सरकारी अनुमति लाइसेन्स बोक्नु पर्ने भएको हो।
त्यस्तो प्रावधानको तयारी गरिए पनि सात वर्षपछि नियमावली संशोधनमार्फत कार्यान्वयनमा ल्याइएको बेलामा सरकारले भूमि सम्बन्धी नियमावलीको आठौं संशोधनमार्फत अनुमति बिना घरजग्गा कारोबार गर्न नपाइने व्यवस्था गरेको हो ।
यता, अनुमति बिना कारोबार गर्ने व्यक्तिलाई कडा कारबाही हुने प्रावधानसहित सरकारले नयाँ कानुनी आधार तयार गरेको छ । यस्तो कारोबारमा संलग्नलाई २५ लाख रुपैयाँसम्म जरिवाना र ६ महिनासम्म कैद सजाय हुने व्यवस्था गरिएको छ । सम्पत्ति शुद्धीकरण रोकथाम र व्यवसायिक वातावरण सहज बनाउन बनाइएको २०८० को संशोधन विधेयकमार्फत मालपोतसम्बन्धी कानुन परिवर्तन गरिएको बताइएको छ।
त्यस्तो अनुमतिपत्र लिन इच्छुकले तोकिएको ढाँचामा सम्बन्धित अधिकारीलाई निवेदन दिनुपर्ने तथा कारोबार गर्ने परिमाणका आधारमा दस्तुर तोकिएको छ । पाँच करोड रुपैयाँसम्मको कारोबार गर्ने संस्थाले पाँच लाख रुपैयाँ तिर्नुपर्नेछ भने सोभन्दा बढी कारोबार गर्नेले दस लाख रुपैयाँ बुझाउनुपर्ने भएको हो।
साथै, अनुमति अवधि सकिँदै जाँदा नवीकरणको प्रक्रिया अघि बढाउनुपर्ने एवम् सोही प्रयोजनका लागि कारोबार परिमाणअनुसार चार लाखदेखि आठ लाख रुपैयाँसम्म शुल्क तिर्नुपर्ने प्रावधान राखिएको छ । अनुमति सकिनु भन्दा ३५ दिनअघि नै नवीकरणका लागि निवेदन दिनुपर्ने जनाइएको हो ।
