कन्जुमर इलेक्ट्रोनिक्स प्रदर्शनी भदौ १३ देखि भृकुटीमण्डपमा

 मीडिया स्पेस सोलुसनस नेपालका अध्यक्ष श्रीजल भट्टराईले यो प्रदर्शनी चौथो पटक हुन लागेको बताउनुभयो । उहाँका अनुसार अनुसार यसपटक स्वदेशी तथा विदेशी कम्पनीका १५० भन्दा बढी स्टलहरू रहनेछन् । ती स्टलमा उच्च गुणस्तरका अत्याधुनिक प्रविधि भएका ट्रान्समिसन तथा डिस्ट्रीब्युसन सामग्री, ऊर्जा आपूर्ति तथा नियन्त्रण यन्त्र, हाउस वायरिङ सामाग्री, वायर, केबल, कन्डक्टर, नवीनतम प्रकारका स्वीच, एलइडी लाइटिङ, इलेक्ट्रोनिक्स उपकरण, घरेलु विद्युतीय उपकरण, चार्जिङ स्टेशन, ब्याट्री, कार्यालय प्रविधि तथा अन्य विद्युतीय सामग्री प्रदर्शनीमा राखिने छन् ।

नेपालमा बढ्दो जलविद्युत उत्पादनलाई विभिन्न विद्युतीय माध्यममार्फत खपत बढाउने, आयात प्रतिस्थापनमा सहयोग पुर्याउने र ऊर्जा व्यवसायलाई सबल बनाउन महत्वपूर्ण योगदान पुर्याउने उद्देश्यले प्रदर्शनीको आयोजना गरिएको उहाँले बताउनुभयो । साथै, यस प्रदर्शनीले विद्युत, इलेक्ट्रोनिक्स र होम अपलायन्स उद्योगसँग सम्बन्धित व्यवसायीहरूलाई एकै ठाउँमा ल्याई आपसी साझेदारी, अनुभव आदान–प्रदान र नयाँ व्यापारिक अवसरहरू सिर्जना गर्ने विश्वास गरिएको भट्टराईको भनाइ रहेको छ ।

मीडिया स्पेस सोलुसनस नेपालका अध्यक्ष भट्टराईले भट्टराईले भन्नुभयो,‘पावर, लाइट एण्ड इलेक्ट्रिक तथा कन्जुमर इलेक्ट्रोनिक्स प्रदर्शनी भदौ १३ देखि १५ गतेसम्म भृकुटीमण्डपमा हुँदैछ । बिहान १० बजेदेखि बेलुका ६ बजेसम्म चल्नेछ । मेलामा प्रवेश शुल्क निशुल्क राखिएको छ । इलेक्ट्रिक पावर लाइट भन्दा बित्तिकै इलेक्ट्रिक उपकरणहरु सबै कुराहरु यसमा संलग्न हुन्छन् । होम इलेक्ट्रोनिक कन्जुमर इलेक्ट्रोनिक्स पनि पर्ने गरेको छ । टेक्नोलोजी भनेको हरेक वर्ष अपग्रेड भइरहेको छ । यो प्रर्दशनिलाई हामीले ती सामाग्री शुभारम्भ गर्ने थलोका रुपमा लिर्दैछौं । नयाँ के भइरहेको छ बजारमा, अपग्रेड के भयो टेक्नोलोजी त्यस मेलामा ल्याएर नेपालको कन्जुमरलाई देखाउनेछौं ।’

अध्यक्ष भट्टराईका अनुसार दशैंको अवसरलाई लक्षित गरेर आयोजना गरिएको प्रदर्शनीमा उपभोक्ताहरूलाई विभिन्न ब्रान्डका विद्युतीय सामग्री एउटै स्थलमा हेर्न र मनपर्ने सामान खरिद गर्न सक्ने अवसर मिल्नेछ । नेपालमा दशैंतिहार जस्ता चाडपर्व नजिकिँदै गर्दा नयाँ विद्युतीय सामग्री खरिद गर्ने परम्परा रहेकोले प्रदर्शनीले ग्राहकलाई आकर्षित गर्नेछ ।

प्रदर्शनीमार्फत राष्ट्रिय तथा अन्तर्राष्ट्रिय विद्युत, इलेक्ट्रोनिक्स, सञ्चार, सूचना प्रविधि र वैकल्पिक ऊर्जा उद्यमीहरूलाई एकै स्थानमा जमघट गराई व्यवसाय प्रवद्र्धन गर्ने, नवीनतम उपलब्धीहरूको जानकारी आदान–प्रदान गर्ने तथा उपभोक्तालाई ऊर्जा व्यवस्थापन र दिगोपनाबारे सचेत गराउने लक्ष्य लिइएको उहाँको भनाई छ ।

नेपालको ऊर्जा तथा विद्युतीय बजारलाई सबल बनाउन, गुणस्तरीय सामानको प्रयोगमा जोड दिन र विद्युतीय उपकरणमा आत्मनिर्भरता बढाउन यस प्रदर्शनीले सकारात्मक प्रभाव पार्ने विश्वास गरिएको छ । प्रदर्शनीले उपभोक्ता र उद्योगबीचको सम्बन्ध सुदृढ बनाउन मात्र नभई नेपालको समग्र अर्थतन्त्रमा योगदान गर्ने अपेक्षा पनि आयोजकले गरेका छन् ।

३ दिनसम्म चल्ने यो प्रदर्शनीमा घरेलु कम्पनीका उत्पादनलाई प्रवद्र्धन गर्ने अवसरसँगै अन्तर्राष्ट्रिय कम्पनीका नवीनतम प्रविधिबारे प्रत्यक्ष जानकारी पाउने अवसर सहभागी र दर्शक दुवैलाई हुनेछ । नेपाल इलेक्ट्रिक, इलेक्ट्रोनिक्स, पावर, लाइट तथा कन्जुमर इलेक्ट्रोनिक्स एण्ड होम अपलायन्सेस प्रदर्शनीले व्यवसायी, उपभोक्ता र नीतिनिर्मातालाई एउटै मञ्चमा ल्याई ऊर्जा र विद्युतीय बजारलाई दीगो बनाउन आधारभूत योगदान गर्ने आयोजकको विश्वास छ ।