सारियो कक्षा १२ को परीक्षा, वैशाख २१ गतेबाट सुरु हुने
काठमाडौं । वैशाख ११ गतेका लागि तोकिएको कक्षा १२ को राष्ट्रिय परीक्षा सारिएको छ । परीक्षाको मिति सरेर वैशाख २१ गतेदेखि मात्रै सुरु हुने भएको हो ।
यता, शिक्षकहरूको आन्दोलनका कारण राष्ट्रिय परीक्षा बोर्डले परीक्षा सार्ने निर्णय गरेको हो । यसअघि प्रधानमन्त्री केपी शर्मा ओलीले कक्षा १२ परीक्षा सार्ने विषयमा बोर्डका अध्यक्ष महाश्रम शर्मा र शिक्षा सचिव दीपक काफ्लेसँग छलफल गरेका थिए । छलफलका क्रममा प्रधानमन्त्रीले परीक्षा सार्न सकिने अवस्था रहेको खण्डमा सार्न अनुरोध गरेका थिए ।
साथै, सोही आधारमा बोर्डले वैशाख २१ गतेका लागि परीक्षा सारिएको अध्यक्ष शर्माले बताए । यसअघि बोर्डको आज बिहान बसेको बैठकले तोकिएकै मितिमा परीक्षा गर्ने निर्णय गरेको थियो । कर्मचारी परिचालन गरेर भए पनि परीक्षा गर्ने तयारी रहेको थियो ।
