नेप्सेको सिइओ नियुक्ति भएकै दिन घट्यो बजार, कारोबार रकम ५ अर्बमा खुम्चियो
काठमाडौं । नेप्सेले सिइओ पाएकै दिन सेयर बजार घटेको छ । सोमबार बसेको मन्त्रिपरिषद् बैठकले नेप्सेको सिइओमा चूडामणि चापागाईंलाई नियुक्त गर्ने निर्णय गरेको थियो, जुन खबर मंगलबार मात्रै सञ्चारमाध्यमा प्रकाशित भएको थियो । यही दिन नेप्से परिसूचक १६.९५ अंकले घटेर २६७६.१७ बिन्दुमा बन्द भएको छ ।
आज कारोबार रकम पनि घटेको छ । जम्माजम्मी ३२० कम्पनीको १ करोड ६ लाख ७० हजार ६४९ कित्ता शेयर किनबेच हुँदा ५ अर्ब ७९ करोड ७७ लाख ९१ हजारभन्दा बढीको कारोबार भएको छ । अघिल्लो कारोबार दिन आइतबार ७ अर्ब ३० करोड ७४ लाख ११ हजारभन्दा बढीको कारोबार भएको थियो ।
यसदिन ४२ कम्पनीका लगानीकर्ताले नाफा कमाएका छन् भने भने २०१ वटा कम्पनीका लगानीकर्ताले घाटा बेहोरेका छन् ।
आज गार्डियन माइक्रोलाइफ इन्स्योरेन्सको मूल्यमा सकारात्मक सकिर्ट लागेको छ । यसको मूल्य २३४.५० रुपैयाँ बढेर २५७९.८० रुपैयाँ पुगेको छ । त्यसैगरी गुराँस लघुवित्तको मूल्य ५.५६ प्रतिशतले घटेर २९५३.४१ कायम भएको छ ।
नेप्सेका अनुसार आज कारोबारमा आएका १३ वटा उपसमूहमध्ये व्यापार समूहबाहेक सबै समूह राताम्मे छन् । यो समूह ३.८० प्रतिशतले बढेको छ ।
कारोबारमा आएका कम्पनीमध्ये मंगलबार हिमालयन रि इन्स्योरेन्सकै बढी कारोबार भएको छ । कम्पनीको ६४ करोड २५ लाख ६६ हजार रुपैयाँभन्दा बढीको कारोबार भएको छ । बढी कारोबार हुनेमध्ये दोस्रोमा एनआरएन इन्फ्रास्ट्रक्चर, तेस्रोमा सिइडिबी होल्डिङ रहेका छन् ।
