हिमालय एयरलाइन्सको पोखरा अन्तर्राष्ट्रिय विमानस्थलबाट सेवा सुरु, मंगलबार बिहान ८ः२० बजे ल्हासाका लागि उड्ने
काठमाडौं । पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सुरु गरिएको छ। आजदेखि हिमालय एयरलाइन्सले पोखरा–ल्हासा नियमित उडान सुरु गरेको जनाएको हो।
यता, पोखरा अन्तर्राष्ट्रिय विमानस्थल कार्यालयका महाप्रबन्धक प्रेमनाथ ठाकुरका अनुसार १ सय ७ जना यात्रु बोकेर ल्हासाबाट आएको हिमालयको जहाज दिउँसो पौने दुई बजे पोखरा विमानस्थलमा अवतरण भएको हो। योसँगै हिमालय पोखरामा नियमित अन्तर्राष्ट्रिय उडान थाल्ने पहिलो वायुसेवा कम्पनीसमेत बनेको छ।
सो जहाज भोलि बिहान ८ः२० बजे ल्हासाका लागि उड्नेछ। योसँगै हिमालय एयरलाइन्सको जहाज अब हरेक सोमबार ल्हासाबाट पोखरा आउनेछ र मंगलबार पोखराबाट ल्हासाका लागि उड्ने तालिका रहेको छ।
साथै, हाल हिमालय एयरलाइन्ससँगै चिनियाँ वायुसेवा सिचुवान एयरलाइन्सले पनि सातामा एउटा चार्टर्ड उडान गरिरहेको छ। हिमालय एयरलाइन्सले भने नियमित उडान थालेको छ। आगामी दिनमा यात्रु संख्या बढेमा यसलाई विस्तार गरिने एयरलाइन्सले जनाएको हो।
